عزيزتى البنت المصرية اللى فوق التلاتين ولسة على نياتها.. 




  


 قابلتى واحد فوق الاربعين وفضل يشتغلك من بعيد لبعيد وممكن يكون معاكى في الشغل وبيوصل للى حواليكى انه معجب بيكى لكن في النهاية مابيقربش ناحيتك.
او ممكن يقرب وساعة الجد تلاقى قصص مابتنتهيش، في واحد قال لواحدة انه عليه عفريت مش عايزه يتجوز وواحد تانى قال لها انه عاجباه مزة في العشرينات وتالت قال لها انه معقد من الستات ومش قادر يتغلب على العقدة دى.. وغيره وغيره وغيره 
 شوفى يا حبيبتى النوع دا من الرجالة اللى فوق الأربعين وملاوع كدا، تحمدى ربنا انك نفدتى بجلدك منه لان دا عادة بيكون يا اما "GAY" أى "مثلى" وعايز يستخبى في أى قصة شوية كدا وبعدين ينقل على اللى بعدها وتلاقيه بينط من قصة لقصة لكن مابيتجوزش ابدا.. 
 يا اما معقد فعلا من الستات ودا لو اتجوزتيه هيطلع عينك والجوازة مش هتستمر كتير فبرضه احمدى ربنا انك نفدتى بجلدك بدرى بدرى، وانسى انك تعرفى تعالجيه، في كليات بتخرج دكاترة ومع ذلك بيفشلوا في علاج الناس دى.. 
 يا اما صايع وبتاع ستات ومقضيها وبيتنطط من واحدة لواحدة وهو وشطارته بقى وكل واحدة وذوقها واللى بيعرف ياخده منها وفى النهاية برضه دا عينه زايغة وبيحب يعيش حر وفى النهاية مش هيتجوز غير لما يلاقى واحدة صايعة تعرف تلعبه على الشناكل وتخلص فيه الجديد والقديم وبرضه هى وحظها بقى.. 
 يعنى ملخص الكلام انك يا اما بتحبى: مثلى، أو مريض نفسى أو صايع..
وفى كل الحالات دى احمدى ربنا اوى انه غار في ستين داهية واكسرى وراه زير.. 

 بس خلاص