ممكن من فرخة واحدة تعملي أكتر من 4 أكلات

ده مش سحر ولا شعوذة



1- الصدر : طلعنا منه (بانيه) ---- > وأدي أول أكله

يعنى تعمليها مع مكرونة بالصلصة مثلا مع بطاطس محمرة مع سلطة خضراء
وحيكون نصيب كل واحد منكم قطعتين كبار ، انتِ قطعتين وزوجك قطعتين
وممكن لو في أسرة مكونة من 4 أفراد ، كل فرد ياخد قطعه وتزودي في البطاطس المحمرة شوية وفي السلطة


2- الوراك ---- > دي تاني أكلة

أنا بعمل منها أكتر من صنف
1-
إما أسلقها وأحمرها في الزبدة ،، أو أحمرها في الزيت بخلطة الشيف
الحار ، وأقدمها مع الأرز المصري وخضار (طبيخ) ، وبستخدم الشوربة أعمل بيها
الطبيخ وشوربة لسان عصفور لأن زوجى بيحبها أوي
2-
إما بعملها في صنية بطاطس –وعندي أكتر من طريقة لصنية البطاطس
بالفراخ ، علشان أنوع علشان زوجى ميزهقش – أبسط طريقة منهم (بحط البطاطس
حلقات سميكة ، مع البصل حلقات ، ووركين الفرخة بدفسهم وسط البطاطس واحط ملح
وفلفل أسمر ورشة بهارات مع ورق لورا وفص حبهان وشوية مايه صغيرين واغطيها
بفويل واحطها في الفرن)
3-
أو أعملها بطريقة خليجية (بجيب ملح وفلفل وكمون وكزبرة ناشفة وبهارات
وكركم وحبة ماجي واحبش بيهم الوراك واسيبهم مثلا ساعة على الأقل ، وبجيب
حلة أحط في قعرها بصلة متوسطة اقطعها حلقات وفصين ثوم حلقات ، وشوية زيت ،
واجيب الوركين انيمهم على البصل والثوم وأغطي الحلة بفويل واسيبها تستوي
على نار هادئة جدا لمدة ساعة او ساعة الا ربع) وأقدمها مع الأرز البسمتي
الخليجى الأصفر
وممكن تعملى بالوراك حاجات كتير أوي ، أنا قولتلك مجرد أمثلة



3- بقية الصدر المخلي والأجنحة ---- > دي ثالث أكلة

بجيب بقية الصدر اللى انا خليته وطلعت منه البانية ، وبجيب حلة صغيرة يادوب
تكفي انى اسلق فيها الصدر ، واحط معاه الجناحين والزور ، وأسلقهم عادي
أكني بسلق فرخة كاملة
وبعد ما يستوي ، بنشله من الشوربة وأصفيه
وبستفيد منه أكتر من استفادة :-
1- ممكن اخد الشوربة اسقي بيها المحشي علشان يستوي
2- ممكن أخد الشوربة أعمل بيها بشاميل (لأني بعمل البشاميل باللبن والشوربة مش بلبن بس)
3-
ممكن أعمل بالشوربة ، شوربة لسان عصفور (لان زوجى بيحبها أوى واليوم
الوحيد اللى مش بيشرب فيه شوربة اليوم اللى بنكون عاملين فيه سمك)
4-
الصدر نفسه بعد ما نشلته من الشوربة وصفيته ، بفصصه ، واطلع كل اللحم
اللى كان لازق في العظم ومطلعش معايا وأنا بخليه علشان البانيه، وبيطلع
معايا لحم كتير ما شاء الله بس قطع صغيرة
اللحم ده بقى بستفيد منه في أكتر من حاجة
1-
بعمل مثلا على العشاء بيض بالدجاج (بجيب قطع الدجاج دي وأحطها مع
الزبدة على نار هادئة لحد ما الزبدة تسيح وأكسر عليهم مثلا ثلاث بيضات كبار
أو 4 بيضات بلدي وارش ملح وفلفل )
2- أو بعمل بقطع الدجاج دي صنية مكرونة بالبشاميل محشية دجاج بدلا من اللحم المفروم
في طرق كتير ممكن تجبيها من النت بيستخدموا فيها قطع الدجاج الصغيرة
3- أو بعمل شاورمة فراخ


4- الكبد والقوانص ---- > دي رابع أكلة

بجيب الكبد والقوانص وأقطعها مكعبات في حجم عقلة الإصبع ، واجيب حلة صغيرة
أو طاسة صغيرة ، وأحمر القوانص أولا في الزبدة مع التقليب ، وبعد 3-4 دقائق
مثلا أضيف الكبدة واقلب بردو لمدة 3 دقائق ، وبعدها أضيف بصلة صغيرة
مفرومة فرم ناعم ، وأضيف فلفل رومي مقطع مكعبات صغيرة ، وحبة طماطم واحدة
صغيرة بردو متقطعه مكعبات صغيرة ، وأضيف ملح وفلفل أسمر ورشة بهارات صغيرة ،، (بتطلع أكلة جميلة جدا) .
ممكن أعملها ساندوتشات على العشاء وأقدم معاها طماطم وخيار متقطعين حلقات
أو ناكلها على الغدا مع أرز بسمتي خليجي أصفر اللى بيتعمل بالتوابل الخليجية والبهارات والخضار
منقول للافاده