كل سنه وكلكم طيبين وفى احسن حال ولرمضان مستعدين بالقرأن والصلاة والصيام

انا حبيت اقولكم طريقتى فى التوفير لرمضان يمكن تلحقوا تعملوا حاجة فى الاسبوعين تلاته اللى باقيين
انا كل ما باروح للسوبر ماركت اشترى حاجة للبيت اشترى حاجة واحدة او اتنين زيادة على حسب الفلوس اللى معايا يعنى مثلا كيسين مكرونة او كيس رز او كيس سكر او فول او حتى نوع من انواع التوابل مثلا تم كيلو كمون مش مطحون او باكيت مرقة دجاج او زجاجة عصير يعنى حاجات فى حدود الخمسة جنيه وكل واحدة وميزانيتها واللى تقدر تعمله
واخزن دا فى كيس واحطه فى مكان معين فى دولاب الخزين بعيد عن الحاجات اللى باستعملها ومرة على مرة بتجمعى شوية حاجات خلال الفترة دى والضغط مش هيكون كبير على ميزانيتك الحالية او ميزانية شهر رمضان .
وكذلك الخضار واللحوم يعنى كيلو طماطم زيادة ويتعمل صلصة او نص بامية ويتنضف وعلى الفريزر او نص مفروم ويتعصج ويتشال .
لان انا واحدة من الناس مش باقدر اجيب كميات اخزنها وبرضه رمضان اكله عادى لكن باهتمام اكتر ولو عزومة والا اتنين خلال الشهر الكريم بيحتاجوا ميزانية لوحدهم .
واخيرا اوصيكم ونفسى بالصدقات يعنى من اللى بنوفره نعمل كيس او اتنين ونديهم لحد قريبنا او جارنا او البواب او الراجل اللى بيكنس الشارع اى حد محتاج
وربنا يتقبل منا ومنك صالح الاعمال