لو سلمنا ان الجواز قسمة ونصيب وقدر يبقى احنا مابنخترش امتى هيجيلنا أنفلوانزا لان الانفلوانزا بتيجى في اى وقت. ولو اعتبرنا ان الجواز اختيار فكل سن له مميزاته وعيوبه، يعنى اللى بيتجوز بدرى في العشرينات بيلحق يجيب عيال وهو في صحته ويلحق يلعب ويدادى وهو في صحته وبيتعود على المسئولية بدرى بدرى لكن مابيبقاش عاش حياته وخد خبرة كفاية ومابيبقاش عرف هو محتاج ايه ومش محتاج ايه فبالتالى نسبة الندم بتكون اكبر فى الجواز فى السن الصغير. واللى بيتجوز في سن أكبر من كدا يعنى من اول التلاتينات فيما فوق بيبقى عاش حياته وعمل كل اللى نفسه فيه وعرف ايه احتياجاته بالظبط وبالتالى بيختار نسبيا على أسس سليمة لكن بيجيب عيال متأخر والصحة على القد فبالتالى بيطلع تلاتينه في تربيتهم. وإن سألتونى على رأيى الشخصى فأنا مع الجواز بعد التلاتين سواء للراجل او البنت. عيشوا حياتكم، اشتغلوا وانجحوا وكونوا شخصياتكم واعرفوا انتوا محتاجين ايه من الدنيا ومن الانسان اللى هيكمل معاكم مشواركم علشان تعرفوا تختاروا على اسس مظبوطة وماتبقاش جوازة والسلام.
افضل سن للزواج بين الشباب
