محافظ القاهرة يغلق الهاتف في وجه محمود سعد على الهواء مباشرة
محافظ القاهرة يغلق الهاتف في وجه محمود سعد على الهواء مباشرة
فوجيء الإعلامي محمود سعد في حلقة الليلة من برنامج "في الميدان"، الذي يقدمه على قناة التحرير، بمحافظ القاهرة الدكتور عبدالقوي خليفة يغلق الهاتف في وجهه على الهواء مباشرة، حينما عاتبه محمود سعد على تراخي المسئولين بالمحافظة في رفع القمامة من الشوارع. وطلب سعد محافظ القاهرة على هاتفه للحصول على تعليقه، بعد عرض تقرير في البرنامج عن انتشار القمامة بالقاهرة، خصوصا بعد الثورة، وعدم وجود تحرك إيجابي لتنظيف الشوارع، فقال المحافظ لسعد إنه يبحث هذا الأمر وسوف يشكل لجانا للعمل على رفع القمامة والاستعانة بالمواطنين وخاصة الطلبة في فترة الإجازة الصيفية لتنظيف الشوارع. فاعترض سعد على فكرة تشكيل لجان وقال للمحافظ "يا فندم احنا سمعنا الكلام ده 50 مرة قبل كدة ولم يحدث شيء ولم نر أي تقدم" فقال المحافظ "سمعته 50 مرة ازاى ده أنا أول مرة أكلمك"، فأوضح سعد "أقصد سمعناه من المحافظ اللي قبلك ومن كافة المسئولين في الحكومة السابقة. كل مشكلة يقولولنا هنشكل لجنة.. ومش بنشوف أي نتيجة.. يعني حضرتك ما سمعتش الكلام ده قبل كدة يا سيادة المحافظ؟"، فأجاب المحافظ بانفعال: "لا ما سمعتوش"، فقال سعد: عموما يا سيادة المحافظ الناس مش عايزة لجان ومش هتستنى الدراسة، المشكلة واضحة وعايزة قرارات ثورية وحاسمة وإن حضرتك ورؤساء الأحياء تنزلوا الشارع بنفسكم ويحصل إشراف ومتابعة لرفع القمامة وحل المشكلات"، فقال المحافظ إنه بالفعل اتفق مع منظمات أهلية ووضع خططا لرفع القمامة وفيه فعلا تقدم ملموس في الشارع.. كل ده وبتقول معملناش حاجة.. وبعدين استنى لما تشوف نتيجة اللي بنعمله بلاش يأس"، فقال له سعد: "يعني يا سيادة المحافظ ده وعد من حضرتك انك..." فهنا انفعل المحافظ أكثر وقطع كلام محمود سعد قائلا: "يعني ايه وعد بيني وبينك.. مش انت اللي هتقيم شغلي.. مع السلامة" وأغلق الهاتف في وجه محمود سعد قبل أن يكمل كلامه. فقال محمود سعد: "شكرا يا سيادة المحافظ.. ولما الإعلام مش هيقيم شغل المسئولين.. مين اللي هيقيمه؟... ما هي دي نتيجة ان الدكتور عصام شرف جاب لنا مسئولين غير ثوريين في الحكومة وفي كل المناصب.. والنتيجة انهم بيتعاملوا بنفس عقلية المسئولين في النظام السابق".
محافظ القاهرة يغلق الهاتف في وجه محمود سعد على الهواء مباشرة
