مواصفات زوج غبى - بيخبى على مراته هو بيجي له كام في الشهر، ما هو يا ننوس ماما انت لما تخبى عليها تبقى مش بتشركها في المسئولية وبالشكل دة هتطلع عينك طلبات، لكن لو عارفة حدودك وحدودها هتساعدك.. والله تستاهل طلباتها.
- بيعاملها على إنها أمه ويخبى عليها بيروح فينن بيقابل مين، بيكلم مين، عامل باسوورد على كل حاجة، مسيرها في يوم تقشك وهتبقى ليلتك أسود من قرن الخروب، ليه ماتعاملهاش كصديقة وتعيش حياة سعيدة بدل ما تخللى نفسك بالنسبة لها مجرد زكيبة الفلوس ويبقى اسمك الحركى مع أهلها "الموكوس".
- بيعاملها بمنتهى قلة الذوق ومش بيقول لها كلام حلو ولا بيدلعها غير لما يكون عايز سيكو سيكو فالنتيجة انها مش بس بتكره السيكو سيكو لأ دى بتكرهه هو شخصيا وبتحس انها فتاة ليل وبتبقى العلاقة الحميمة علقة بالنسبة لها، بتمثل فيها انها سعيدة لانها فاكرة انها لو ماعملتش كدة، هيبص لواحدة تانية والبيت هيتخرب والعيال هتتشرد.. وتروح هى بعد كدة تعوض نقص الحب دة بحبوب مقطقط من على الفيسبوك.
- مش بيعاملها كأنثى من الأساس، دى الولية بتاعت البيت وهو بيعط برة وبيؤدى واجباته الزوجية على سبيل المنحة كل سنة مرة، تصدق؟ انت الخيانة حلال فيك.
- بتاخد رأى ماما في لون بيجامتك؟ في أكلك؟ وفى عيشتك كلها ومراتك صفر على الشمال، ماتجوزتش ماما ليه يا حبيب ماما، عارف مراتك بتشوفك ازاى؟ شحط بتيتينة في بقه.
- بيرمى كل الحمل عليها ومسئولية العيال ومش بيسيب لها وقت تهتم فيه بنفسها وبعدين يرجع يشتكى انها شبه متولى صاحبه، مانت لو اديتها وقت هتبقى هيفاء وهبى وللا تكونش فاكر هيفا بتقف تشطب المواعين والعيال على كتفها.. صحيح راجل عدو نفسه.
- بيتعصب عليها ويطلع فيها همه وغله من مديره، جاره، صاحبه، وكأنها الساند باج اللى جابوها له، منتظر منها ايه غير انها تدعى عليك في سرها ليل ونهار؟
- بيستخصر فيها، يعنى يصرف على نفسه والعيال واهله حلو اوى وييجى لغاية عندها وهوب ستوب، منتظر ايه غير انها تشوفك معفن وتسقط من نظرها وماتحسش انها متجوزة راجل من الاساس؟؟ الحب عطاء وانت لما بتستخصر فيها الرسالة بتوصلها صح.. انك مش بتحبها.. منتظر انها تحبك؟
- لما يخرج معاها وهى لابسة يا كبد أمها وعلى سنجة عشرة يقعد يتفرج على الستات اللى حواليها ولا كإنها كيس جوافة محطوط على كرسى قصاده، فتقعد يا ولداة تسب وتلعن في سرها فيه وفى الساعة السودا اللى خرحتها معاه، والخروجة يا اما تنتهى بقرصة محترمة، بنية أو قمصة مع حالة اشمئزاز عنيفة من الزوج وكإنها شايفة فسيخة أودامها.. مانت بتتهبب تمشى لوحدك كتير ابقى اتفرج ساعتها براحتك لكن وهى معاك راعى شعورها يا بجم.
- عينه زايغة وبيعمل علاقات مع ستات تانية، يعنى بتطعنها في أنوثتها وش، انت عارف ساعتها الست بتتمنى ايه؟؟ انها تطعنط في رجولتك.. في .... أهو في أى حاجة والسلام تشفى غليلها منك.
- بيستندل معاها لما تحتاجه وينفض لها ويسيبها ويخرج مع اصحابه وكإنه متجوز اصحابه مش متجوزها هى.. ما هو لو ليك ميول شاذة طب اتجوزتها ليه؟ لما مش ناوى تخليها رقم واحد ومليون في حياتك اتجوزتها ليه؟؟
القائمة طويلة لكن نكتفى بهذا القدر الآن، كل دى مواصفات زوج غبى اتجوز علشان يعيش تعيس ويتعس الانسانة اللى معاه، لو اى واحد مش متجوز ناوى لما يتجوز يعمل حاجة من الحاجات دى يبقى خليك قاعد جنب أمك يا سيد أمك..
من أمام محكمة الأسرة
أمل محمود
امل محمود تكتب.....مواصفات الزوج الغبى
