امل محمود تكتب



"الرجالة بتشوفنا كدة"

1. هى دايما تردد عبارات جدتها وهى ان البيت مسئولية الست، وتعالى للواقع بأه هتلاقى ان خراب البيت هو مسئولية الست (اللى من النوع دة).
2. زمان كانت الستات بتطبخ حسب ماتربينا وشفنا امهاتنا لكن بنات اليومين دول تقول لك "لأ انا عمرى ما دخلت مطبخ وماما طول عمرها مدلعانى" وانسى الطبيخ يا معلم واعمل حسابك ان لو ربنا كرمك وفتحها عليك ح تعيش ع الدليفرى، ولو على قدر حالك يبأه ح تقضيها معلبات، فول وجبنة ويوم الأجازة بالكتير تونة"، دول مايعرفوش يعنى ايه مسئولية أصلا..
3. تقول لك "لأ كده ماينفعش يا حبيبى احنا لازم نحوش للزمن" تفرح اوى انت بيها وبنفسك وزى السطل تديها المرتب كل أول شهر وتاخد انت مصروفك اللى بالعافية بيكفيك و تخليك تبطل سجاير لان الميزانية لا تسمح، وانت نايم وحاطط فى بطنك بطيخة صيفى ومستعجب من شطارتها، على طول شعرها معمول وكل شوية تغير لونه ولبسها شيك جدا، واودام اول ظرف طارئ تقول لك "فلوس فلوس ايه ده يا دوب اللى جاى على قدر اللى رايح، ده انا حتى مابقتش اعمل مانيكير وباديكير غير مرتين فى الشهر بس علشان أوفر"..
4. لو ارتبطت بيها تعتقد هى انك اتبنيتها وترمى عليك المسئولية بدل ابوها وتبتدى بأه "تعالى ودينى وتعالى خدنى، عايزة أدخل الفيلم الفلانى، ماتيجى نتعشى فى المكان العلانى" وهى تحوش مصروفها وانت تفضل تشحت لآخر الشهر.. ده مش حب دى برشطة..
5. وحتى فى شغلها تخلص شغل من هنا وتقعد تدش فى ودانك كل مشاكل شغلها والمصايب اللى هى واقعة فيها ومنتظرة منك انك تشوف لها حل ومعندهاش اى مانع انك تروح تتصدر لها، مسئولية ايه دى عايزة اللى يمشيها حتى فى شغلها..
6. كنا بنشوف زمان فى بيوتنا العزايم اللى امهاتنا بتعملها لأهلها ولأهل جوزها لكن فى الزمن ده انسى، كتير من بنات اليومين دول مايعرفوش حاجة لا عن الواجب ولا عن المسئولية، يعنى هتلاقى نفسك بتشترى السفرة يا معلم ديكور واعتبرها تحفة كبيرة هتكتب لك عليها "ممنوع الاقتراب او التصوير"..
7. و لما ح تتجوزها ح تشوف العجب كله، انت باه فاكر انها هتهتم بيك وتدلعك وتهتم بحاجتك لكن ح تاخد اكبر خابوووررر هتلاقى هدومك على طول فى سبت الغسيل مستنية الشغالة اللى بتيجى مرة فى الشهر ولو تذمرت هتقول لك "وانا اعمل لك ايه؟ انت فاكرنى حاوى والا الجارية اللى اشتريتها، اغسلهم انت" ح تلاقى نفسك انت اللى بتغسل ولما بيوحشك الطبيخ انت اللى بتطبخ وانت اللى بتفطر نفسك م الآخر انت مجرد جار فى البيت..
8. و لما بتخلف كده بأه خلصت، انسى انك عندك زوجة لأ انت عندك عيال قاعدين عندك بأمهم لفترة لا يعلمها الا الله، يعنى هما دايما الأول وانت بعد الآخر كمان مابقتش مسئوليتها خلاص، قال يعنى كنت قبل كده..
9. لأ واللى يضحك فعلا انها تقول لك أنا بشتغل زيى زيك وفى النهاية مرتبها بيروح على ماكياجها وكوافيرها ومواصلاتها وانت اللى بتدفع فلوس الحضانة والشغالة اللى بتقوم بكل شيئ فى الحياة فبتلاقى الأرخص فى النهاية انك تتجوز الشغالة وتشترى نفسك..
10. زمان الستات كانت عيالها عندها هى نمرة واحد لكن دلوقتى شغلها هو نمرة واحد ونمرة اتنين صاحباتها ونمرة تلاتة ولادها، فمبدأيا مش عايزة ترضع طبيعى علشان جسمها مايبوظش وان عملتها تفضل تقطمك كل شوية كانك انت اللى اخترعت الرضاعة، وبتفطم العيال بسرعة وانسى زمان لما العيال كانت بترضع لسن سنتين، ما هى عايزة تنزل شغلها، ولو ماوديتش العيال الحضانة بتسيبهم مع الشغالة فى البيت ومش مهم ايه اللى ممكن يحصل لهم، ولو مافيش شغالة ممكن جدا تسيبهم فى البيت لوحدهم و تنزل..فعلا مسئولة أوى..
11. تعالى بأه يا معلم لكل الواجبات العائلية بتاعت اهلك هتلاقيها على طول يا اما عندها مغص وبتتلوى يا اما صداع رهيب ومش قادرة تفتح عينيها، يا اما تقولها لك وش، بصراحة أهلك بيئة ومش بينزلولى من زور، النهاية تلاقى نفسك انت اللى بتروح لوحدك وطبعا أمك تنأرزك بكلمتين لانك مش عارف تحكم مراتك وتعلمها الذوق والواجب، وكأن الواحد بيتجوز علشان يتبهدل..
12. ده حتى المصيف زمان أمهاتنا هى اللى كانت بتحوش وترتب موضوع المصيف ده من أوله لآخره لكن الهانم من دول دلوقتى تقول لك "اعمل حسابك انا عايزة اصيف فى حتة عدلة السنة دى آه يعنى مش أقل من شرم أو الغردقة" وتدوخ انت بأه يا معلم بين الفنادق على الريتس بتاعة السيزون وفى النهاية دماغك تلف فتملا لها البانيو وتبدر لها شوية ودع فيه وتغرقها وتصيف انت فى أبو زعبل..

من زور راجل مخنوق
أمل محمود