فضايح صور البروفايل:




_ صورة وش: لو محجبة وحاطة صورة وشها بس من غير باقى دماغها تبقى مش راضية عن حجابها ومش عاجبها شكلها بالحجاب أصلا ومش عايزة حتى تشوف نفسها به، ولو مش محجبة تبقى شايفة ان شعرها نقطة ضعف وبتداريه، ولو راجل فدة فرحان بملامحه أوى ومصدق الست الوالدة اللى بتنفخ فيه ليل ونهار.. صحيح "خنفسة شافت ابنها ع الحيط قالت دة لولى ملضوم فى خيط"
_ صورة بفستان أو ببدلة الفرح: وتلاقيه قاصص نفسه ومطير المدام، دة معناة إنه مش طايقها جنبه حتى فى الصورة وبيحاول يبهر البنات بالبدلة اللى معتقد انها أنضف ما لبس فى حياته، أما هى بفستان الفرح لوحدها فبتقول للناس "أنا كنت زى الوردة المفتحة" وبتبقى مش عايزة تشوف نفسها بعدما الوردة دى إتنتف ورقها ورقة ورقة.
_ صور ببدل وفساتين سواريه: هى بتدور على عريس، إعتقادا منها إن العريس دايما بييجى فى الأفراح فبتحول صورة البروفايل لفرح مستمر يمكن ييجى، أما هو فبيحاول يقول للناس "والله أنا مهم وبلبس بدل وكدتة" ومايخسرش إنه يطلع بأى مصلحة.
_ صور العربيات والماركات والأشياء بصفة عامة: ما هو لما أشوف ان صورة العربية أحلى منى وإن صورة شنطة لوى فيتون أنضف من منظرى أبقى أنا إختراع مادى فحت، الناس دى بتتبع فى الحياة مبدأ "اللى معاة قرش يسوى قرش".
_ صورة أسد، حصان، طاووس: عادة بيكون راجل طبعا لان ست دى هتبقى شتيمة، ودة بيبقى عنده تفاقم فى منطقة الذكورة وعاشق للجنس.
_ صور كلاب وقطط وحيوانات أليفة: الناس دى مدمنة حيوانات فخللوا بالكوا اى حيوان مايقربش من البروفايل دة لا يلاقى صورته مكان صور كلابهم تانى يوم.
_ صور شخصيات من افلام فى قمة القبح: دول ملحدين ومش عارفة ليه لما هما شايفين نفسهم بالقبح دة مستمرين فى اللى هما فيه؟ ويجرى ايه لما تبقى ملحد بصورتك عادى؟ ما هو ان خفت ماتقولش وان قلت ماتخافش وللا ايه؟؟
_ صور كلمة "الله" و"محمد" وصور السما والمسيح والعذرا وأى رمز دينى أو صور كرتون: ناس متدينة جدا وفى الغالب متعصبة أوناس بتدارى على مصيبة وواخدة الدين ستارة بتستخبى ورارها، بس أموت وأعرف مين اللى فهمهم إنهم لما يحطوا صورة ميكي ماوس انهم كدة بيتقربوا لربنا؟؟ لا ميكى ماوس نبى ولا ربنا والت ديزنى.. هقول ايه ربنا يشفى..
_ صور لاعيبة كرة القدم: وعادة بيكونوا رجالة ودول متعصبين بالفطرة لأى شئ بيشجعوه أو لأى فكرة بيؤمنوا بيها، عمليين جدا وأبعد ما يكون عن الرومانسية والمشاعر والكلام دة.
_ صور كمال الأجسام والصور العريانة اللى بالسلسلة: دى رجالة معتقدة ان عقل الراجل فى عضلاته وفى منهم عشاق للرياضة ومنهم بيتمنظروا بعضلاتهم أما الرجالة اللى بتتصور بمايوهات وسلاسل فى البحر فدول مكانهم مش هنا لكن فى أى فيلم إغراء مع هند رستم أو مكانها مش هتفرق كتير.
_ صور المغنيين والمغنيات: دول بيبقوا حاجة من اتنين يا اما زى "مجنون سعاد حسنى" يا إما أكاونت مضروب الهدف منه شئ معين غير التواصل يعنى ممكن للتجسس، ممكن يطلعوا لجان الكترونية او اى حاجة مقلقة والسلام.
_ صور علم وثورة مصر ورؤساء وسياسيين مصر ورموز أحزاب وجماعات: دى ناس السياسة كلت صورهم مش بس دماغهم، وبيعتقدوا ان اهميتهم الوحيدة مستمدة من الرمز اللى بيمشوا يهللوا له، دى ناس شمولية تعشق انها تكون من أتباع فلان، أتباع حزب، أتباع جماعة.
_ صور عم محمد المصوراتى: الناس اللى لسة بتتصور عند عم محمد وتنزل الصور بفلاشة على الكمبيوتر ومنه على الفيسبوك، الناس دى من عصر بابا عبده، ووجودهم أصلا على الفيسبوك إنجاز لا يقل إعجازا عن بناء السد العالى.
_ الصور المشقلبة واللى فيها ألوان، أوضاع، أشكال مش طبيعبية لأصحابها: دول يا ولداه ناس متميزة جت فى زمن غلط قتل كتير من تميزهم على أرض الواقع فالجنان بقى يطلع فى صور الفيسبوك وبس.
_ صور الأولاد: لو ست فهى أم بمعنى الكلمة وأهم حاجة عندها ولادها، لو أب يبقى يا إما فعلا بيحب ولاده جدا وشايف انهم الحسنة الوحيدة للمزغودة اللى متجوزها يا إما بيتقى شرها وبيحاول يقنعها انه راجل ملتزم ومش بيعط على الفيسبوك بدليل انه حاطط صور ولاده بس دول بيعاكسوا برضه عادى جداااا.
_ صور الخطاب والأزواج: فى مرحلة الخطوبة بيبقى الانسان محدث لسة يا ولداه وشايف ان اللى حصل له أملة لازم يشارك العالم فيها، أما المتجوزين اللى بيحطوا صورهم مع بعض وساعات معاهم الأولاد فدول يجب حصرهم وعمل محمية طبيعية للحفاظ عليهم من الانقراض.
_ صور أينشتاين وجيفارا والمفكرين والكتاب: قال يعنى العيال مثقفة.. عباقرة زى أينشتاين، مناضلة زى جيفارا، مفكرة زى أرسطو، موهوبين زى صلاح جاهين.. بلا نيلة لو كان دة واقع ماكانش بقى دة حالنا.
_ صور العلامات التجارية ورموز المؤسسات والشركات: الناس دى بتعمل دعاية للحاجات دى ولو بتعملها ببلاش تبقى محتاجة تعامل معاملة الأطفال أو يتم الحجر عليها.
_ صور الكتب: دول كتاب يا عينى بيحاولوا يعملوا دعاية لكتبهم فى بلد مابتقراش وفى عصر القنوات الفضائية والكتب اللى ببلاش على النت.
_ صور سودا وحداد وصور الشهداء: الناس دى كئيبة بالفطرة وبتتلكك، عمر الحزن ما كان بالصور ولا بالألوان وكتير بتبقى رمز لجماعة سياسية معينة.
_ صور غريبة: تفضل متنح لها ساعة وتكبرها وعمال تحاول تفهمها، ماتتعبش نفسك الناس دى أصلا مش فاهمة الصور اللى حطاها ولا فاهمة نفسها من الأساس.
_ صور واضحة: زى صورتى دى كدة دى ناس واثقة فى نفسها، ماعندهاش حاجة تخبيها أو تتكسف منها ومن الاخر كدة قمر قمر قمر

بعد خبرة سنين على الفيسبوك
أمل محمود