امل محمود تكتب..ايها المز والمزه 
"مظ" و "مظة"
-فى أوروبا والدول المتقدمة اخترعوا دايت الخضار ودايت الفواكه، لكن احنا بعون الله اخترعنا دايت المحشى، يعنى تلاقى الواحدة من دول بسم الله ما شاء الله قاعدة تضرب صوانى محشى ومصقعة وبط ووز وحمام لكن البيبسى لاااااا لازم يكون دايت.
-القرار بالدايت بيتاخد النهاردة لكن التنفيذ دايما بكرة، والنهاردة حفلة بقى زى حفلات توديع العزوبية كدة مليانة ما لذ وطاب والمصيبة ان دة سيناريو كل يوم وبكرة دة مابيجيش أبدا.
-احنا الشعب الوحيد اللى العلماء بيفكروا يعدلوا فيه علشان يستفيدوا من الشنطة اللى ورا والبروزات والمناور اللى أودام.
-فى مصر المفروض الراجل يلبس "Bra" زيه زى الست، دة فى رجالة بتبقى شوية وهترضع يا جدعان.
-إكتشف العلماء أن الإكتئاب مرض يصيب المصريين عندما ينوون الدايت ويصل إلى حد البكاء الهيستيرى والدبدبة فى الأرض أما قطع الشيكولاتة.
-المرأة الأوروبية عاملة زى غزال المها، واحنا عندنا تلاقيها اسمها "مها" لكن مالهاش اى علاقة بالغزال ومدية على سيد قشطة.
-الأجنبية لما بتلاقى أكلة تعجبها بتاكل بحرص شديد، المصرية بتاكل صوابعها وراها.
-الجناين انقرضت فى مصر والخروجات بقت كلها مطاعم، والزيارات ولايم، ولو قلتى انك عاملة دايت ياختاااى تبقى قليلة الذوق ومش عاجبك الأكل وصاحبة العزومة ماتهداش غير لما تسففك كل أصناف الترابيزة.
-فى مصر الميزان بيقلب العداد ويجيب من الاول علشان يكمل وزن اللى واقف عليه.
-اللبنانية هى المستهلكة رقم واحد فى الوطن العربى لأجهزة الحفاظ على الجمال بينما تطارد المصرية أجهزة المطبخ حتى فى مراكز التجميل، قالت لك "والنبى جهاز البخار بتاع البشرة دة ممكن يعمل أحلى خضار".
-ساعات بيكون صعب انك تحضن مراتك كلها مرة واحدة فتضطر تحضن كل حتة لوحدها.
-وعلشان كدة ظهرت صور المقاطع على الفيسبوك، تلاقى واحدة حاطة لك عين، مناخير، شفايف، نص وشها، ماهو الوش كله صعب يدخل جوة الصورة.
-البيه لما بيعمل دايت بيخللى المدام تطبخ له أكل مخصوص وكأنها مربية "بولدوج" بجانب العيال.
-الرياضة الوحيدة اللى بنمارسها فى البيوت هى رياضة ورق العنب.
-عايزين ايه من شعب معتقد ان "الراجل من غير كرش زى البيت من غير إرش" وإن "قلب الراجل فى معدته" رغم ان العلم أثبت ان قلب الراجل دة أسطورة إغريقية أصلا.
-وتلاقيها قاعدة تتفرج على إعلانات الأجهزة الرياضية وجرى تتصل وتجيب ويكون مصير كل الأجهزة تحت السرير مش تحتها هى.
-الأجنبى يتجوز يحلو يا جدع والمصرى يتجوز يتحول لشئ أشبه بكلب البحر بيتدألج فى البيت طول النهار، ولما تحط فى بقه ورك فرخة يصقف.
-تعجبنى المصرية لما تنويها وتجيب لك أدوية تخسيس وعيش "سن" وتغمس به طبق فول بالزبدة من اللى قلبك يحبه.
-يعجبنى المصرى لما يحط فى الشاى سكر بنى علشان قوامه اسم النبى حارسه وصاينه ويضرب مع الكوباية حتة جاتوه.
-يعجبنى الإتنين فى "الأوبن داي" ودة اليوم المفتوح بتاع المديتين، مفروض يكون كل اسبوع لكن فى ناس بتعمله كل 3 ايام، وبيبقوا أشبه باللى جبته من مجاعة وحطيت أودامه كل خيرات الله، الناس يومها مش بتاكل دى بتبلبط فى الأكل يا جدعان.
من أودام طبق المحشى
أمل محمود
امل محمود تكتب..ايها المز والمزه
