سيناريو ليوم 30/6

نهار خارجى
30 يونيو, محيط قصر الاتحادية
عدد من المتظاهرين يحيطون بشاب اخوانى من أنصار مرسى , و يدفعونه بالايدى, و يصيحون فيه

الاخوانى مرتعبا: يا اخواننا اللى بتعملوه ده خطير و مش هيؤدى الى مزيد من الفوضى و الانقسام
متظاهر 1: غوروا بقى الله يحرقكوا الناس قرفت منكو
متظاهر 2: فوضى مين يا ابو فوضى؟الفوضى و الانقسام دول من بركات الاهل و العشيرة
متظاهر3 مؤمنا على كلامه: مظبوط, احنا كنا صف واحدة و ايد واحدة, انتوا االلى خربتوها و زرعتوا الانقسام و الفرقة

الاخوانى و هو يرتجف خوفا: يا جماعة استهدوا بالله, مهما كان مرسى رئيسنا المنتخب و لازم نحترمه
المتظاهرون يهجمون عليه مجددا و يبدأون فى دفعه ثانية بالايدى و الارجل

متظاهر1: - الاستبن ده يبقى رئيسك انت يا خروف , أنا مليش رئيس الا البرادعى
المتظاهرون يتوقفون فجأة عن ضرب الاخوانى, و يلتفتون إلى المتظاهر 1 , يحدقون فيه و الشرر يتطاير من أعينهم

متظاهر 2 لمتظاهر 1: البراضعى ده رئيسك انت يا تويتراوى يا سيس, انا مليش رئيس الا حمدين
متظاهر 3 لمتظاهر 2: - حمضين ده رئيسك انت يا قومجى يا عرة, أنا مليش رئيس الا ابو الفتوح
متظاهر 4 لمتظاهر 3: - تتح ده رئيسك انت يا ارهابى يا متلون , أنا مليش رئيس الا شفيق
متظاهر 5 لمتظاهر 4: -الفشيق ده رئيسك انت يا فلولجى, أنا مليش رئيس الا ابو اسماعيل
ثم يتركون الاخوانى الذى يسرع بالهرب, و يشتبكون فى عراك عنيف بالايدى و الأرجل,لعدة دقائق, ثم يتوقفون لحظات لالتقاط أنفاسهم

متظاهر1: -البوب خسارة فيكو يا زبالة, انتوا ملكوش الا الاخوان , كمّل يا مرسى
متظاهر2: -حمدين اصلا مايشرفوش يحكم عبيد زيكو نسيوا معنى العزة و الكرامة, ملكوش الا المرشد يذلكو و يستعبدكوا , كمّل يا مرسى
متظاهر 3: -ابو الفتوح إرهابى؟ ماشى, كمّل يا مرسى ووريهم الارهاب على أصوله
متظاهر 4: -ايه اللى يخلى واحد زى سيادة الفريق قيمة و سيما, يقل عقله و
يوجع دماغه مع شمامين الكولة و ثورجية اللمون اللى زيكو, كمل يا مرسى

متظاهر 5: -انتوا خلاص شعب استمرأ الانحلال و الفساد و عنده هلع من حكم الاسلام الصحيح, كمّل يا مرسى و زدهم على ضلالهم ضلالا

ثم يستأنفون الاشتباك من جديد, و فى تلك اللحظة يعود الاخوانى حاملا صينية عليها أكواب و على وجهه ابتسامة عريضة
الاخوانى: يا جماعة مش كده, أستهدوا بالله, انتوا ايد واحدة و صف
واحد,ماتخلوش الشيطان يدخل بينكو, ياللا تعالوا, جبتلكوا اللمون اللى
بتحبوه, اشربوا و روقوا دمكم و بعدين كملوا براحتكم