س1: هى أثيوبيا بتتحكم فى أد ايه من مية النيل ؟
ج1: النيل له منبعين...بحيرة تانا فى أثيوبيا ودى بييجى من عندها زى ما
واضح فى الصورة النيل الأزرق وده مصدر فرعى للنيل..بينما النيل الأبيض اللى
هو مصدر النيل الرئيسى بيطلع من بحيرة فيكتوريا ويمر فى أوغندا والكونجو..
والاتنين..النيل الأبيض والأزرق بيتحدوا فى السودان وبعدين ييجوا لنا فى شكل نهر واحد..
بيميز النيل الأبيض اللى هو المصدر الرئيسى ان سريان المية فيه ثابت إلى
حد كبير طول السنة..بينما النيل الأزرق اللى جاى من أثيوبيا بيتأثر جامد
بالتغيرات المناخية..ممكن يقل أوى أو يزيد أوى...
لما بنقول عندنا فى
مصر ان النيل منسوبه قليل أو كتير السنة دى..فده بيبقى عادة نتيجة تغيرات
فى كمية المية اللى جاية من النيل الأزرق بتاع أثيوبيا.

س2: هل سد النهضة بتاع أثيوبيا ده السد الوحيد على النيل غير السد العالى ؟
ج2: لا...مجموع السدود على نهر النيل حتى الآن 5 غير سد أثيوبيا..
السد العالى..3 سدود فى السودان...وسد فى أوغندا...
مش بس كده...أثيوبيا بتعمل 4 سدود تانية غير سد النهضة ده...منهم واحد شغالين فيه بالفعل من 2009...
وعلى فكرة اسمه اتغير دلوقتى وبقى اسمه: سد الألفية..

س3: امال اشمعنى السد ده اللى عليه مشكلة ؟
ج3: لأنه ضخم جدا..أكبر من السد العالى..هايبقى أكبر سد فى افريقيا ومكان
بناه قريب من منبع نهر النيل الأزرق فى أثيوبيا وبالتالى هاتعدى عليه معظم
المية اللى جايه من بحيرة تانا..اللى هى منبع النيل الأزرق..

س4: طيب هم هايبتدوا يبنوه امتى؟
ج4: السد ابتدى بناه بالفعل فى ابريل 2011 والمفروض بناه ياخد 4 سنين...يعنى خلص نصه بالفعل..

س5: امال ايه الضجة اللى حاصلة على موضوع تحويل مجرى نهر النيل الأزرق ده ؟
ج5: تحويل مجرى النهر دى خطوة طبيعية بتحصل فى منتصف خطوات بنا أى
سد...وحصلت عندنا سنة64 فى منتصف خطوات بنا السد العالى..وبتحصل فى أثيوبيا
فى منتصف خطوات بنا سد الألفية الأثيوبى..

س6: طب اثيوبيا ازاى كده تأثر على المية اللى جاية لنا ونسكت لها ؟
ج6: اللى بتقوله أثيوبيا ان السد مش هايأثر على المية اللى جاية لنا..لأن
باختصار الغرض من السد مش حجز مية عندهم للرى..الأراضى عندهم مرتفعة عن
مجرى النهر زى ما باين فى الصورة..وبالتالى استفادتهم من النيل كده كده فى
الرى محدودة..انما هم عايزين السد علشان يولدوا منه كهربا..وبالتالى المية
هاتعدى وتيجى لنا عادى برضه بعد ما يتسفيدوا منها فى توليد كهربا عن طريق
مولدات الكهربا اللى هايحطوها على السد زى ما احنا عاملين فى مصر بالنسبة
للسد العالى..بس المولدات اللى هايعملوها عندهم أضخم بكتير من السد العالى
وبالتالى هايبقى عندهم توليد كميات رهيبة من الكهربا وعايزين يصدروها لدول
افريقية تانية..منها السودان..ومصر كمان لو احنا عايزين...

س7: امال احنا معترضين ليه بقى مادام مافيش مشكلة ؟
ج7: معترضين لأن خبراء الرى عندنا بيقولوا: ان المشكلة مش فى حجز المية
ورا السد..المشكلة ان حجز المية ده هايؤدى لتبخرها تدريجيا وكمان فيه هدر
لها هايحصل فى توليد الكهربا..وبالتالى مع الوقت على مر السنين نسبة المية
اللى هاتيجى لنا هاتقل تدريجيا على مدار سنين طويلة..

س8: طيب وايه اللى بيحصل حاليا فى النزاع ده؟
ج8: اللى بيحصل حاليا ان فيه لجنة من 10 خبراء..2 من مصر و2 من السودان و2
من اثيوبيا..و4عالميين محايدين بيدرسوا المشروع نظريا وعمليا ويشوفوا اذا
كان فيه فعلا ضرر على مصر ولا لأ..وايه الضمانات والاحتياطات اللى ممكن
تتعمل علشان ماننضرش..

س9: طب نفترض انهم لقوا فيه ضرر..هل ممكن يوقفوا بنا السد ؟
ج9: مش هايحصل..اثيوبيا كده كده مكملة فى السد..دول صرفوا عليه بالفعل
مليارات..وبيحولوا مجرى النيل..وفيه عقود مع شركات عالمية للبنا
والتوريد..وفيه تمويل من بنوك صينية...

س10: طب والحل ؟
ج10:
قدامنا حلين..الحل الأول العنف..وده كان الإتجاه أيام النظام السابق..وكان
فيه تهديدات لأثيوبيا بضرب السد عسكريا..والتوتر والتصعيد أدى لأن أثيوبيا
تعند أكتر وتكمل وكمان رفضت تورينا التصميمات والدراسات اللى هى
عاملاها...مش بس كده..مشيت فى الاتفاقية الإطارية سنة 2010 بتاعة توزيع
مياه النهر مع بقية الدول الافريقية لأنها متهمة مصر والسودان بأنهم
بياخدوا أكتر من حقهم فى مية النيل طبقا لإتفاقية سنة 1929 اللى عملها
الإنجليز وبتدى مصر والسودان هيمنة على نهر النيل...ومصر والسودان اعترضوا
على اتفاقية 2010 ومارضيوش يمضوها..مصر معترفة ان اتفاقية 29 مش عادلة بس
المشكلة ان ماعندناش مصدر تانى يعتمد عليه للمية وابتداءا من سنة 2017 مية
نهر النيل مش هاتكفينا لوحدها حتى فى ظل اتفاقية 1929..مابالنا لو نقصت
حصتنا من المية..لكن بعد كده السودان اتفاهمت مع اثيوبيا ووافقت على
الاتنين..سد أثيوبيا واتفاقية النهر بشكل مبدئى...
التصعيد العسكرى
والعنف مش هاينفع لأنك هاتورط نفسك وجيشك..وعندك السد بتاعك اللى ممكن
يتضرب برضه وهاتبان قدام العالم انك معتدى..وهم عندهم 4 سدود تانيين غير
ده..هاتضربهم برضه ؟ وكل ما دولة تعمل سد هاتضربهولها ؟
الحل التانى هو
التفاهم والتعاون والاستفادة...اذا كان فيه ضرر من السد..وده هايبقى بناءا
على رأى لجنة دولية فيها خبراء محايدين شغالة دلوقتى..هايبقى موقفك قوى
انك تاخد ضمانات واحتياطات..وممكن تاخد منهم كهربا ببلاش أو سعر قليل
وخبراءك يروحوا على حسابك يساعدوا فى التعديلات الهندسية اللى تضمن ان مصر
ماتتأثرش من ناحية المية..وفى نفس الوقت اتفاهم معاهم فى اتفاقية التوزيع
العادل لمياه النهر...وقدم لهم اللى يغريهم علشان حصتنا من المية ماتقلش..
والأهم من ده كله انك تحسن علاقتك بيهم بشكل مستمر وتتغلغل جوه افريقيا
بقوة مصر الناعمة علشان الدول دى تحس انك صديق لهم مش عدو...وده اللى كان
عبد الناصر بيعمله ومبارك أساء فيه خصوصا من ساعة محاولة اغتياله فى أديس
أبابا...وده اللى مرسى بدأ فيه من أول يوم توليه للحكم وحرص السنة دى كمان
انه يروح لهم ويتكلم معاهم فيه..رغم انه كان لسه حاضر المؤتمر الافريقى
هناك من كام شهر..
وده انعكس على تصريحات كريستوس وزير الدولة الأثيوبى للشئون الخارجية بعد زيارة مرسى الأخيرة لما قال:
«لدينا علاقات ممتازة حاليا مع مصر، لكن النظام المصري في الماضي لم يكن
يبذل جهدا في البحث عن التعاون معنا والمصلحة المشتركة للشعبين، ولم يكن
هناك أي نوع من أنواع التعاون المشترك الذي يعود بالمصلحة على البلدين، ولم
يلعب النظام السابق دورًا جيدًا في تعزيز العلاقات مع إثيوبيا، وجعلها
مفيدة».
وتابع أن العلاقات بين البلدين الآن تسير في الاتجاه الإيجابي
والصحيح، وهناك تفهم لدى النظام الحالي بأهمية أن تقوم العلاقات بين
البلدين على أساس المنفعة المشتركة من أجل ازدهار مصر وإثيوبيا، مشيرًا إلى
أنه تم الاتفاق على تبادل الزيارات بين المسؤولين من الجانبين.."