المقادير
(اللي بالأحمر المقادير .. اللي بالموف رغي وملاحظات من عندي)

لفة جلاش (أنا بستخدم الزهار)
سوسيس (ده زيادة من عندي على الوصفة .. واستخدمت اصبعين سوسيس بس .. اللي كانوا عندي بعد ما عملت بيتزا بالباقي )
طماطم (استخدمت حبتين متوسطين)
فلفل رومي (استخدمت حبتين حلوين كده)
فلفل حامي (برضو من عندي مش في الوصفة الأصلية وحطيت حبتين)
جبنة رومي مبشورة (اللي مش عندو مبشور .. نفس الحتة الحزينة اللي بتقعد في التلاجة دي من غير مبرر بتاعة كل مرة .. قطعوها ولا اطحنوها في الكبة ولا ابشروها .. اتصرفوا يعني )
شريحة جبن شيدر (دي برضو من عندي لقيتها ماشية لوحدها في التلاجة برضو روحت مقطعاها وضيفاها)
زيتون مخلي (ياسلام بقى لو أسود على أخضر زي مانا عملت يبقى اخر دلع .. لو مفيش اللي موجود يسد ولو مش عندك مخلي سكينتك في ايدك زيتونك في تلاجتك اللي يقولك اشتري قطعيه .. اخليه انتي )
معلقة معجون طماطم أو صوص بيتزا (برضو من افتكاساتي .. بس اديت طعم تحفة .. هي كانت معلقة باقية من ساعة البيتزا وسرحانة فاصطدتها واستخدمتها)
3 أكواب زبادي (أنا كان عندي زبادي لايت قولت ميضرش وكان عندي كوبايتين بس فبعد ما فضيت واحدة منهم مليتها نصها لبن ونصها وش اللبن اللي هي بنقول عليها بالمصري قشطة وعادي يعني بنتصرف)
ملء كوب الزبادي زيت (بعد ما تفضي الزبادي املي الكوباية زيت وياريت لو زيت درة طعمه بيبقى أحلى حاجة)
ملح وفلفل (لواحتجتي .. أنا عامة احتجت وحطيت قولت ميضرش )

نقول باسم الله ونبدأ الطريقة

نولع الفرن علشان يسخن على درجة حرارة عالية
نقطع السوسيس شرائح رفيعة شوية والفلفل الرومي والحامي مكعبات صغيرة والطماطم مكعبات صغيرة
وده هيبقى شكل المكونات مع الجبن والزيتون


وده شكل المكونات كلها ما عدا الزيت هوريهولكم بعد شوية



وبعدين نجيب طبق عميق علشان أنا استذكيت قوي وحطيت في طبق افتكرته كويس وبعدين اكتشفت انه بعد المكونات ما تتحط مش هيبقى عميق كفاية
ونحط الزبادي في الطبق ونحتفظ بالعلبة الفاضية (لو الزبادي عندكم مكنش كفاية ممكن تعملوا زي ما قولت وتحطوا لبن وقشطة في كوباية الزبادي الفاضية زي الصورة ونحطهم على الزبادي ونخلي الكوباية هنحتاجها يا جماعة)



نملى نفس الكوباية اللي محيرانا دي زيت زي الصورة كده ونحطها على الزبادي واللبن



عارفين الكوباية؟؟؟ ارموها بقلب جامد خلاص مش عايزنها وحطوا البيض والملح والفلفل على الخليط وهيبقى زي كده



بالمضرب العادي بقى ونخفق الخليط ده لحد ما يتجانس .. أظن مفيش تفصيل ممل أكتر من كده .. طبعا ملاحظين اني نقلت طبق تاني .. اعملوا نفسكم مش واخدين بالكم بقى .. أنا لسه مبتدئة بجد



ننزل بقى بالسوسيس والطماطم والفلفل ونقلب



وبعدين ننزل بالجبن ونقلب



وبعدين معلقة الصوص اليتيمة (اللي هيستعمل صلصة طماطم عادية ممكن عليها رشة زعتر هتبقى تحفة)



كده خلصنا التجهيز نركنه على جنب بقى ونيجي للجلاش ... تابعوني في المشاركة الجاية ...

فاصل ونواصل ....