وبكدة نكون خلصنا 28 وصفة ...يمكن تكون فى وصفات متكررة ودة لانى كنت بحاول اجمع خلاص الوصفات اللى جاتلى. تانى حاجة بالنسبة للعزومات: حاولى انك تعملى اكلات تمشى مع بعضها وقللى فى الكمية يعنى اعمل اكتر من صنف وقللى الكمية هتلاقى السفرة تملا العين وفى نفس الوقت مش هيطلع عينك. نجى بقى لتالت حاجة وهيا الوصفات اللى شارك بيها الفتوكات فى الجزء الاول: المشاركة الأصلية كتبت بواسطة ماما فينو اولا الستيك بالمشروم والطريقة دى بتاعة ابو شقرة وانا جربتها وطلعت حلوة
شرائح بيكاتا بتلو نتبلها بالملح والفلفل الابيض والاسود وليمون ومسحة خفيفة مستردة وتترك فترة نحمرها من الجانبين فى صينية فيها زبدة وزيت وتكون سخنة جدا وعلى نار عالية نرفع البيكاتا من الصينية ونحط بدلها حلقات بصل ونشوحها شوية وبعدين نضيف المشروم نضيف اللحمة تانى وبعدين شوية شوربة ونظبط الملح والفلفل وبهارات لحمة خفيف قوى عشان طعم الفلفل والمشروم يبان
دقيقة كدة ونضيف حوالى 3 ملاعق كريمة لبانى وممكن تستبدليها بربع كوب ماء على 3 ملاعق لبن بودر
تغلى غلوة ونقفلها بفويل وتكمل تسوية فى الفرن لحد التسوية ولو احتاجت مياه ابقى زودى لحد ما تستوى
المشاركة الأصلية كتبت بواسطة ماما فينو تانى حاجة الجبنة المقلية
هى بتتعمل بالجبنة الموتزاريلا بس بصراحة انا دقت الجاهزة منها والبيتى محبتش طعم الموتزاريلا هى شكلها حلو بس ماسخة وده مجرد رأى بالنسبة لى انا بجيب قوالب الجبنة الشيدر بس اللى ليها نكهة معينة زى طعم الفلفل الحامى او المدخنة ...
بقطعه صوابع او مربعات صغيرة زى ما تحبى وبعدين بغمسها فى الخليط ده
(لبن و ملح وفلفل ابيض وزعتر ناشف بس مش كتير ونشا ودقيق وبيض) وبعدين ادحرجها كويس فى البقسماط واشيلها فى الفريزر لحد وقت الاستعمال ويكون الزيت سخن جداغزير يغطيها وقت القلية
وما تخليهاش كتير عشان ما تسيحش مجرد تاخد اللون الذهبى وده فى خلال دقيقة ع النار او اقل شوية
ممكن تقدم مع صلصلة بيتى او كاتشب حار
المشاركة الاصلية بواسطة ماما فينو ندخل بقى على الفراخ المشوية
هتجيبى فرخة انا بحب البلدى وبراحتك تقطعيها 8 قطع او اربعة او تسيبيها زى ما هى او تفتحيها من الظهر وده اللى انا بفضله
نتبلها بالآتى
(ملح وفلفل و قرفة وجنزبيل وليمون او خل وزعتر ناشف وبهارات فراخ و بابريكا وشطة وكاتشب ومايونيز ومستردة وبصل مبشور وتوم مدقوق)
تبات ليلة
ننزل التتبيلة من عليها ونحتفظ بيها على جنب
نعمل الصدمة بس بدون اى دهون عشان فيها مايونيز وطبعا الصينية تكون سخنة قوى
تتحمر ونضيف فصوص حبهان وورق لورا والتتبيلة اللى ركناها على جنب من شوية دقيقة كدة
وبعدين نسيبها على نار هادية لحد ما تستوى ونحمر وشها فى الفرن وبالهنا
على فكرة دى طريقة شيف يسرى مع اضافات بسيطة بس ان شاء الله جميلة وتعجبكم
المشاركة الاصلية بواسطةnor eleyman: ديك رومى وزنه 8 كيلو
قولوا ماشاء الله لا قوة الا بالله ******التتبيلة****** بهارات من كل شكل ولووووون ملح وفلفل وحبهان ولورا وجوزة الطيب مبشورة وروز مارى وقرفة وجنزبيل وبهارات فراخ وبصلتين و3حبات طماطم وفصين توم وامسكيهم زى الشاطرة كدة واضربيهم فى الخلاط وتكونى ظابطة الملح طبعا وتكونى غاسلة الديك بالخل والملح ومخلياه زى الفل وبعدها تتبلى المحروس بالتتبيلة دى من كل ناحية وتحاولى تدخلى ايدك بالتتبيلة فى كل حتة وكمان تحت الجلد علشان يتشرب منه وبعد كدة تكتفيه وتحطيه فى حلة وتغطيه بالاسترتش (بلاستيك التلاجة) علشان موش يسرب ريحة للتلاجة وكمان يتتبل كويس ويبات فى التلاجة يوم كامل بعدها تجيبى المحروس وتجيبى خيط يكون متين شوية وتغسليه كويس وتربطيه علشان موش يتفكك منك وهو بيستوى ويكون شكله حلو وبعدها تحضرى الخضار اللى هتسويه معاه انا عملت بطاطس ممكن كوسة او اى حاجة بتحبيها هتجيبى طماطم وبطاطس مكعبات وبصل شرايح وفلفل حاااااااار او رومى براحتك انا خليته حار علشان محدش ياكل منها غيييييرى هههههههوتجيبى المحروس بتاعك بعد مااتربط الربطة اللى هى وتتبلى الخضار بتاعك من التتبيلة اياها (تتبيلة الديك) وتجيبى نصف كوب زبدة او سمن براحتك بردو وتقلبيها بشوية من التتبيلة وتدهنى الديك كله منها وتكونى محضرة الفرن وتحطى الديك فى صينية كبيرة وحواليه البطاطس والخضار حاجة كدة تونسه فى الفرن وتسيبيه فى الفرن لمدة 5ساعات(على كل كيلو نصف ساعة) وكل شوية تراقبيه وتاخدى من الصوص اللى نزل وتسقى الديك بالكامل تقريبا كدة كل ساعة تعملى الحركة دى علشان موش ينشف ويبقى محروق من برة ونئ من جوة بس كدة >
المشاركة الاصلية بواسطة حلا صلاح: طريقة عمل الفراخ التندورى
قطعى الفرخه ل8قطع و شيلى الجلد منها و تكونى محضره كوب زبادى كبير فى الخلاط و عليه بصله كبيره و توم بودرة و بصل بودرة و كارى و زعتر و ملح و فلفل اسود و ومسترده بودرة بنسب متساويه و اعصرى ليمونه كبيرة و شقى الفراخ جنب العظم و تبلى انقعى الفراخ فيها لمده لاتقل عن 6ساعات وبعد كده رصيها فى صينه و غطيها بورق فويل و حطيها فى الفرن و لو احتاجت شويه ميه ضفيها لحد السو و بعد كده شيلى الورق و حطيها تحت اشوايه لحد اافراخ ما تتحمر و بعد كهده حطيها فى سيرفيس و بالهنا و الشفا على فكره الصوص بتاعها بيبقى تحفه.
المشاركة الاصلية بواسطة حلا صلاح: طريقة عمل شوربة الكريمة(فطر او دجاج)
بشوح بصله صغيره و بضيف عليها 2ملعقه دقيق و فلفل اسود وبعد كده اضيف كوب شوربه لحد ماتتخن معاكى و بعد كده اضربها فى الخلاط و اصفيها و اضيف البن حسب الحاجه لحد ما قوامها يبقى حلو زى شوربه العدس و احط عليها ملح و توم وبصل بودرة و لو عندك اى قطعه فراخ و لو بايته اقطعيها عليها و لو ما فيش مش مهم وزوقيها بورقه بقدونس و بالنسبه للبطاطس الكروكيت اسلقى البطاطس عادى و بعد كده اهرسيها و ضيفى عليها بيضه و ملح و فلفل و كمون و صبعيها و حطيها فى بقماط ناعم عليه دقيق و فيجتار و بعد كده سيبيها فى الفريزر شويه علشان ماتفكيش منك و بعد كده حمريها فى زيت سخن بتبقى طعمها حلو قوى.
المشاركة الاصلية بواسطة ماما فينو: الشيش طاووق سهل جدا
انا بعمله من الوراك مش الصدور يعنى انتى اطلبي من بتاع الفراخ كيلو شيش طاووق وهو هيعملهولك من الوراك لانه بيبقى اجمل
وبكدة اكون على اد ما ادرت انا والفتوكات نقول طريقة كل الوصفات الجديدة. ندخل بقى على السلطات واللى ممكن تكون:
سلطة خضرا- طرشى- بابا غنوج- سلطة الطحينة- سلطة الحمص- التومية- الكول سلو- سلطة الفاصوليا الخضرا. ودى بعض الوصفات: أولا: التومية: أنا باعملها بالطريقة الدايت وبتكون طعمها حلو زى برة بالضبط المكونات: بطاطساية مسلوقة جدا جدا مع الإحتفاظ بمية السلق ليمونتين كبار 3 فصوص توم كبيرة بيوريه (مفروم ناعم جدا) خل - ملح 2 ملعقة زبادى كبيرة 4 ملعقة كبيرة مايونيز كبيرة
الطريقة : دى بالذات شرحاها بالتفصيل لإنى عايزاكم كلكم تجربوها لو بتحبوا التومية زيى - بتحطوا كل الحاجات اللى فاتت فى الخلاط وندور لو الخليط سميك نضيف حبة صغيرة من مية السلق ودة بيكون شكلها بعد الضرب بصوا بقى أنا دايما باحتفظ بيها فى برطمان مغلق فى التلاجة زى المايونيز بالضبط وباسحب منه زى ماأنا عايزة بيقعد عندى بالأسابيع وما بيجرالوش حاجة وفى رمضان بيكون متجهز عندى من أول رمضان وباسحب منه الشهر كله.
ثانيا: الكول سلو : ودى بالذات شرحاها برضه بالتفصيل لإنى لاحظت إنها غاليه عالفاضى بالرغم إن هى سهله جدا تتعمل فى البيت عالأقل حتكون مضمونة
المكونات: - نصف كرنب سلطة - واحد جزرة متوسطة - 3 ملاعق خل كبيرة - 4 ملاعق كبيرة مايونيز - ملح - 4 ملاعق كبيرة سكر - 2 ملعقة كبيرة زبادى
الطريقة: - نقطع الكرنب ناعم لو بالكبة يبقى كويس قوى بس عالسرعة الأولى نبشر الجزر ناعم ولو بمبشرة الكبة يبقى أجمل نحط كل مكونات الصوص عى بعضه ولو بالخلاط بيكون متجانس أكتر وبعدين نخلط الخضار بالصوص وبالهنا والشفا. ملاحظات هامة جدا: -ما تحاولوش تعملوا كمية كبيرة فى المرة الواحدة لإن طعم الكرنب بيتغير بعد يومين علشان كدة أنا إقترحت نصف كرنبة - الجزر كميته بتكون أقل من الكرنب دايما لو أكتر بيكون لون الصوص برتقالى ودة مش مطلوب.
سلطة الفاصوليا الخضرا :
بصوا يا جماعة السلطة دى أنا واخداها من عضوات جميلات كتبوا عنها قبل كدة فى المنتدى وخصوصا موضوع التعامل مع البصل كنت بصراحة ماعرفوش بس كانت نتيجنه حلوة قوى زى المحلات وطبعا أنضف
المكونات: - 250 جرام فاصوليا خضرا ويستحسن تكون طخينة يعنى مش عاملة رجيم - 2 ملعقة كبيرة سكر - ملح – خل-فلفل - بصلة متوسطة متقطعة جوانح ننقعها شوية فى شوية مية مغلية وخل وشويه سكر صغيرة عشان نهدى شوية فى الطعم - نصف فلفلة حمرا كبيرة متقطعة مكعبات
الطريقة : - نسلق الفاصوليا وملح ونقطتين ليمون ونشطفها ونصفيها من مية السلق - نجهز التتبيلة (ملح –خل –فلفل-سكر) ونحطهم عالفاصوليا والفلفل - نصفى البصل من ميته ونقلبه مع الخضار - وطبعا نسيبها شوية تتشرب.
ندخل بقى على الشوربات واللى ممكن تكون كذا حاجة :لسان العصفور- شعرية- شوربة الكريمة- شوربة الطماطم .
ندخل بقى على العصائر والحلويات: خشاف- قمر الدين- كنافة بالكريمة- عصير مانج او فراوله او مشمش طبيعى- عصير تمر او دوم او ثوبيا او عرق سوس او كركدية- قطايف بالكريمة والمكسرات- لبن بالبلح والعسل- جلاش بالمكسرات او الكريمة- بسبوسة بالكريمة- مهلبية- كسترد- كريم كراميل- سمبوسة بالكريمة والمكسرات- ام على - الماظيه- عصير اناناس بالكيوى- كنافه كب كييك- زلابية وبلح الشام- فروت سلاط- موز باللبن- ارز باللبن.
اما بالنسبة للمقبلات: فاحنا ممكن نحط جنب الاكل بطاطس مقلية- سمبوسة- بطاطس كروكيت- كبيبة شامى- جبنة مقلية. بتدى منظر حلو للأكل وبتحسس الواحدة انها عملت احاجت كتير...ودول ممكن نعمل منهم كمية دلوقتى ونحفظهم فى الفريزر ونطلعهم على القلية
30 وصفه لفطاااار رمضان وبعد الوصفات للعزومااااااااات تعالى بسرعه
