عملت انهاردا كريم كراميل وطلع تحفة بجد وطعمه يجنن ودى اول مرة اعمله من الالف للياء
كنت الاول باجيب البودر الجاهز .
المقادير
كيلو لبن + 10 معالق سكر معلقة شوربة ومش مليانه اوى + 4 بيضات او 5 صغيرين + 2 فانيليا

هنحط كل المكونات فى الخلطات ونضربهم كويس كويس
ونكون الاول مجهزين الكراميل ومقاديره اهى

عشر معالق مايه مع عشر معالق سكر مش مليانيين اوى وندوب السكر فى الميه ونحطه على النار فى كسرولة صغيرة ولما السكر يدوب نحط عصير ليمونه ونقلب كويس ونهدى النار ونقلبه من وقت للتانى لحد ما لونه يغمق بس مش نسيبه يتحرق اوى علشان ما يمررش وبعدين نصبه سخن فى القوالب وتكون اطباق او قوالب ينفع تدخل الفرن مش بلاستيك يعنى
ونضيف الخليط فوق الكراميل والكمية دى تعمل حوالى ست اطباق صغيرين زى اطباق الجيلى او الكب كيك .
ونكون مجهزين صينيه تتسع لعدد الاطباق وحطين فيها ميه سخنه للتلت كدا ونرص الاطباق ونحطها فى الفرن ونكون مسخننينه ونسيبها لحد ما تجمد والوش يحمر على درجة حرارة متوسطة ونحط الصينية فى الرف اللى فى النص .
بياخد حوالى نص ساعة والوش بيحمر ونخرجه ونسيه يهدى وبعدين نحطه فى التلاجة ولما يبرد نقلب الاطباق فى اطباق اخرى واسعه بحيث الكراميل يبقى من فوق زى الصوص كدا وبالهنا والشفا