انت الآن تتصفح منتدى الستات
 قصة مخالب الحب بقلمى حصريا (الجزء الثانى) |
 |
اخر المواضيع منتدى الستات | |||||||||||||||||||||||||||
تم النشر بقلم :shosho:الخميس نوفمبر 27, 2014 12:26 am - -
الموضوع الأصلي : قصة مخالب الحب بقلمى حصريا (الجزء الثانى) // المصدر : منتديات الستات // الكاتب: shosho
| |||||||||||||||||||||||||||
 |
تم النشر بقلم :shosho:الخميس نوفمبر 27, 2014 12:29 am - -
| ||||||||||||||
رد: قصة مخالب الحب بقلمى حصريا (الجزء الثانى)  الحلقه الاولي ــــــــــــــــــــــ مخالب الحب الجزء الثاني 2 ******************************************* إن مراره الايام لم تدوم مثل حلوها ,,فالدنيا هكذا دائما بين هذا وذاك ,,نري الاسود لنشعر بحلاوه الابيض ,,ونري الابيض بعد السواد لنشعر بالامل في الحياه ,,فإن دائما بعد العسر يسرا ودائما تشرق الشمس ,,فنتحمل كل ما تحمله لنا الاقدار من دموع وأهات بصبر ويقين أملين ان تمن علينا بعد حين بضحكات وفرحه تنسينا تلك الالام ولكن تري هل كل البشر تفهم تلك المنظومه القدريه لتعيش في سلام داخلي مع نفسها وتحظي بالرضا الذي يحقق لها السعاده في الحياه؟؟ الحلقه الاولي ************ خرجا مي وحازم من المستشفي ليقف حازم مع مي امام باب المستشفي بعد ان اتكئت مي عليه حيث الجبيره التي وضعها الاطباء علي قدمها اليسري حتي تستطيع ان ترتاح اسبوعان او ثلاثه بدون حركه لتكون ذلك مبررا علي مكوثها في السرير امام والدتها واختها حتي يتم شفائها وتسترد صحتها من اثر العمليه التي أجرتها قبل يومين وبينما هما واقفان مي:إيه يا خالد مستني إيه ,,وقف تاكسي انا مش قادره اقف والله يضع خالد يده في وسطها ويبدو وكأنه يحملها من علي الارض:ما انا ماسكك يا مي اهو ..دقيقه واحده بس..وظل يتلفت يمينا ويسارا مي :إنت مستني حد ولا إيه خالد متوترا :لا ثواني بس يا مي ..ينظر الي ساعته ثم يقول متمتما بصوت واطي,,دقيقه ونمشي مي:في إيه بس فهمني وفجاه يأتي تاكسي يقف امامهم وتنزل منه رنا ,,أخت مي تتقابل عينا مي ورنا وتلقي رنا بنفسها في حضن أختها تبكي بمراره وحرقه :عيوني انتي يا مي ان شالله انا وانتي لئه مي وغلبها البكاء:بعد الشر عليكي يا رب ما تشوفي اللي شفته ابدا كان موقفهما مؤثرا للغايه ادمعت له عينا خالد ,, خالد :يالا بقي انا دمعتي قريبه وبقيت مرهف الاحاسيس ..راعوا مشاعري فيبتسموا ويستقلون التاكسي جميعا في بيت مي مساءا تجلس مي عالسرير وتغمض عيناها وتفتحها ,,فهي تفكر في تلك الايام التي مرت وأنقضت وكيف انقضت ظلت تنظر لها بعين الرحمه رنا وعيونها مليئه بالالم فهي تعلم معاناه اختها تقترب رنا من مي ,,وتمسك يدها ولاول مره تقبل الاخت الصغيره يد أختها الكبري رنا :أنا كان ممكن اموت نفسي لو جرالك حاجه مي بحب وعطف الاخت الكبري ,,تضع يدها علي شعر رنا الاصفر الجميل :انا لا يمكن كنت اسامح نفسي لو أتسببت في ان يمسك سوء تستكمل مي:قوليلي يا رنوش..انا لغايه دلوقتي معرفتش انتي عرفتي إزاي وإيه اللي حصل تحكي رنا بالتفصيل ما جري وكان ذلك قبل يوم اجراء العمليه ل مي رنا :بصي يا ستي ,وصل عالنبي الاول تضحك مي ,,هي حدوته ..؟ عليه الصلاه والسلام رنا :انا من ساعه ما سمعتكوا وانتوا بتتكلموا في الصالون وانتي لسه شاكه هل الحمل نزل ولا لئه ,,سكت وقررت اني هتابع معاكي من غير ما تعرفي عشان اتدخل في الوقت المناسب اللي تحتاجيني فيه كنتي انتي حريصه جداا بس انا أصيع منك علي فكره , تفتح مي عيناها في ذهول ,,لم تكن تعرف ان رنا سمعت حوارها مع خالد قبل الاجهاض بايام \ ,وتكمل بعد ان يضحك الاثنان يوم ما قلتي شغل تبع الجامعه وتدريب عملي وكده حسيت ان في حاجه ,,وسمعتك وانتي بتقوليله ان الحمل لو منزلش بحقنه وعمليه وكلام من ده ,وفهمت طبعا ان في صعوبه في الموضوع وان البامبينو لازق بغرا ومزرجن,,عنيد زي امه المهم سيبتك تروحي من غير ما اقولك ومكنتش عاوزه حاجه غير تقومي بالسلامه ليل ونهار بدعي وابص لامي وقلبي هيموتني خايفه عليكي وخايفه عليها لو عرفت مي:طب والبنت اللي كلمتيها وقالت لك ان العملي هنخلصه سوا ,,قلتيلي رشا تقريباإيه حكايه الموضوع ده ,,انا ساعتها شكيت انك عرفتي ان انا مع خالد رنا :ايوه فعلا انا كنت عاوزه اعرفك رساله ومش عارفه اقولها ازاي..كنت عاوزه اقولك انا عارفه وساكته و معاكي ومش هسيبك ومش هتخلي عنك قلبي كان بيموت في اليوم الف مره عشانك يا مي بعدها بيوم مقدرتش اتمالك نفسي ,,نزلت لخالد في الصيدليه بليل وتتذكر رنا الاحداث في الصيدليه فلاش باك ....\ رنا :مي فين يا خالد خالد وظهر عليه التوتر ,,مي في المعسكر بتاع .. رنا تقطع حديثه:مي في اي مستشفي يا خالد عاوزه اشوف اختي قبل ما يجرالها حاجه وفجأه خالد يقر ويعترف بكل التفاصيل وبدون اي ضغط خالد :أدعيلها يا رنا هتعمل العمليه الصبح وتخرج بعد بكره رنا بكره الصبح؟؟ده انا راحه مع ماما الكشف الدوري بتاعها في التأمين الصحي ,,مش هقدر اقولها لئه خالد :هي كده كده هتخرج تاني يوم ان شاء الله , رنا :يبقي هقابلكوا تاني يوم علي باب المستشفي وأتفقا الاثنان علي موعد , رنا تستطرد كلامها مع مي ,,مقدرتش يا مي ,,وتغمض رنا عيناها وتشعر بمراره الالم وهي تسترجع الاحداث ويهتز صوتها من البكاء,,,لغيت الميعاد بتاع ماما وقلتلها لازم اروح احط نفسي في جروب عشان المشروع العملي ,,,ونزلت رحت المستشفي وسالت عليكي,,ولما سالت في غرفه المناظير وبالعافيه علي ما عرفت اخش ,,لقيت شبشبك علي باب الغرفه ,,انهرت يا مي وتنفجر رنا باكيه معرفش ليه شفت شبشبك حسيت ان الشبشب بيكلمني وبيقولي جيتي متاخر ,,مي كانت لوحدها ,,عاوزه حد يطبطب عليها ,,يمسك ايدها ويقولها تقومي بالسلامه يا رب شده وتزول وتسقط الدموع من عين مي وتضع يدها علي وجهها تستكمل رنا ,,لغايه ما اطمنت عليكي ,,وشفتك وانتي في غرفه الافاقه وبوستك واستلمت السي دي بتاع العمليه منهم وقلتلهم انا اختها ودفعت كمان بقشيش للممرضات ,,وكانوا واقفين زي الوحوش ,, مي :اها ,,يبقي انتي اللي خدتي السي دي انا افتكرت حد من صحباتي اللي كانوا في العنبر فوق لان قالولي اختك خدته ,وبالفعل هذا ما كان مي:كل ده يا رنا , ,وليه مستنتيش اني ارجع البيت رنا بحزن:ما انا مكنتش اعرف انك هترجعي وقلت لازم ابقي مع اختي ومسيبهاش لو حتي هنموت سوا تحضنها مي وهي تبكي :ربنا يخليكي ليه وميحرمنيش منك يا رب تمر الايام وكل يوم تتحسن حاله مي تدريجيا ,,حتي اوشكت ان تستعيد صحتها ,,كانت فكره تجبيس قدميها رائعه ,وفقد جعلتها في الفراش حتي التئم الجروح وبدأت تسترد صحتها لم يترك خالد مي ابدا ,,كان دائما يتابعها ويسال عليها ويكلمها ويزورها وياتي اليها بكل ما تحبه أحس خالد ان الله اعطاه فرصه جديده للحياه ,وفرصه ليعوض مي عن كل ما كان ولكن كانت دائما ام مي متحفزه لتلك الزيجه ,,ترفض تردد خالد المستمر علي مي ,,وفشلت كل محاولات مي وخالد في إستقطابها لهم وفي يوم من الايام وبعد مرور شهر تقريبا خالد ومي في احدي الكازينوهات الاتي تعودا علي التردد عليها خالد :انا عاوز اكلم ماما يا مي في موضوع جوازنا مي:جوازنا؟دلوقتي خالد :إيه المانع ,,ما انتي خلاص خلصتي امتحانات ,, مي "يا خالد كده كده فاضل تسع شهور تقريبا ونستلم شقتنا ,,لزومها ايه نتجوز دلوقتي ووندغدغ العفش في العزال والنقل ينصدم خالد من رد فعل مي الغير متوقع خالد :تسع شهور أيه يا مي ولسه المرافق موصلتش المنطقه ,,أنتي مشفتيش منظرها عامل ازاي بالزمه يعني دي منظر منطقه هتبقي تصلح للحياه كمان تسع شهور؟؟ وتوضيب وتجهيز ,,هتعوز اد كده دلوقتي مي بإصرار :يبقي نستني خالد بحزن :انا كنت فاكر انك مستعجله زيي,يدير وجهه ويكمل كلامه ,نستني يا مي عادي مي تشعر وان كلماتها كانت لها اثر سيء علي خالد :حقك عليه والله ما قصدي انا نفسي ابقي معاك انهردا قبل بكره بس بالعقل يا خالد ميكونش تسرعنا ده غلطه تانيه في حق نفسنا تظهر علامات العبوث علي وجه خالد حيث إصرار مي بإستمرار علي تذكرته بتلك الحادثه التي يبدو وانها لم تغفرها له مي:خلاص يا خالد..تعالي بليل اتعشي معانا ونكلم ماما بليل في الموضوع ده خالد ولا زال وجهه عابثا ,,:مش لازم انهردا يا مي خليها مره تانيه ,,يومين ولا حاجه انتي مستعجله ليه قالها بسخريه مي وبنظره دلال وبصوت حنون تمد يدها لتضعها فوق يده وتحرك شفتيها بدون صوت :بحبك يهز خالد رأسه يشعر بانتصارها وبنظرات كلها حب :اه يا بنت الايه عرفتي نقطه ضعفي وبتلعبي عليها ,, وفي المساء يدق الباب وتقف مي في غرفتها تكمل مكياجها تجلس علي طرف السرير رنا وبنظرات صمت تتابع مي وهي سارحه وتلتفت اليها مي بسرعه مي:افتحي الباب يا رنا بليز لخالد قبل ماما ما تفتح ,تسرع رنا الي الباب لتفتح لخالد رنا تمد يدها :اهلا يا خالد اتفضل خالد :اهلا يا قمر ,,ايه الحلاوه دي انا مش عارف العرسان عنيها عنك فين رنا :طب مفيش اودامك انت عريس بدل ما الكل بيحسدني عليك اونطه ويقولي اكيد جوز اختك مش هيسيبك من غير عريس ,,فين اصحابك يا عم انت وتخرج عليهم مي في رقه :اهلا يا لودي يقترب خالد منها ونسي حواره الذي كان مع رنا ويقترب منها ويمسك يدها ليقبلها فتخرج رنا بعد ان احست بالحرج وانها كالعزول بينهما جلست رنا في غرفتها وامسكت بتليفونها ووضعت السماعات في اذنيها وعلي وجهها علامات لحزن عميق تخفيه في قلبها وبعد نصف ساعه تقريبا سمعت رنا صوت زغاريد اخترق سماعه الاذن ,,فأخرجتها من اذنيها بسرعه لتستمع بإنصات وخرجت لتري ما هو السر وراء تلك الزغاريد ووجدت الام ومي وخالد يقفان في الصالون بينما كانت مي تزغرد بصوت عالي من فرحتها الام :زغرطي يا مي زغرطي خلي الناس تقول البت مسروعه عالجواز بس انا قلت اهو وتشر بأصبعها تنبه عليهم بشده خلال سنه تكونوا نقلتوا شقتكوا وخالد ملزم اودامي بالوعد ده خالد في فرحه :ان شاء الله هنكون في شقتنا خلال السنه الام:والله ما اعرف وايه لزومها تكسير العفش طالع نازل يا ابني انتوا مش لاقين حاجه نعملوها مي تقترب من امها وتقبل يدها :يا دودا بقي خلاص والنبي دلوقتي كمان والله شركات نقل العفش مبقاش في اي تكسير لعفش ده بينقلوا العفش ويغلفوه احسن من وهو جاي من المعرض \الام تبتسم وتستسلم لطلبهما بالحاح في استعجال الزفاف:ربنا يهنيكوا ويجعلكوا لبعض سند وظهر تجري رنا الي غرفتها قبل ان يلمح وجودها احد ثم ترتمي علي السرير باكيه بانهيار وبعد دقائق من حاله الانهيار ترفع راسها من علي السرير وتقف تقترب من المرآه في تسريحتها لتري وجهها ملئته الدموع وشعرها الناعم لاصقا علي وجهها من اثر البكاء ترفع اطراف شعرها بهدوء ثم تظل تضرب بقبضه يدها علي قلبها ضربات عنيفه اوجعتها ووقعت علي اثرها في الارض مغشيا عليها لقد احبت رنا خالد,,احبت تلك الشاب الوسيم الذي ظهر امامها رجوله وثبات لم تحلم يوما بشاب افضل منه فقد كانت تحبه منذ سنوات ..فهو جارهم ودائما كانت عيناها عليه وتتمناه ,,إالي ان شاء القدر واكتشفت انه معجب بأختها واختها تبادله نفس الشعور وبالتالي أصبح خالد بالنسبه لها مجرد فكره و تحول من حلم جميل الي كابوس مفزع ,,تغضب من نفسها وتلومها لمجرد ان تشعر بحنين اليه .وكلما زاد الرباط بين مي وخالد ازداد الالم الذي كان يعتصر قلب رنا ,,ليس لهذا الحب وانما لانها لم تستطيع ان تمنع قلبها من ان يدق لخالد ... ولكن زاد حبها له عندما رأت حبه لمي واحبت خوفه عليها ومساندته لها ولكنها بين نارين كيف تحب ذلك الرجل,,كيف تسمح لقلبها يدق تجاه تلك الرجل الذي هو ملكا لمي ولن يكون لغيرها مهما كان كانت تضرب قلبها لتلومه علي دقاته لخالد علي خفقانه عندما تراه علي ارتعاش دقاته كلما مدت يدها لتسلم عليه وتمر الايام ومي تستعد لفرحها الذي كانت تعد الايام له,,وجاء اليوم الذي تتمناه كل فتاه يوم فستانها الابيض والطرحه ,,وكانت مي في اجمل صوره لها لقد زادها الفستان الابيض عذوبه ورقه وزادتها الطرحه نقاء وصفاء .. لم تكن مي تصدق انها ستعيش لحظات بهذا الجمال في الكوافير كانت مي في الكوافير ومعها رنا تقف الي جانبها ولم تفارقها لحظه واحده دموعها دائما علي وجهها وتاخرت في وضع مكياجها بسبب تلك الدموع مي تجلس علي الكرسي في غايه الجمال والاناقه بفستانها الابيض المرصع بالفصوص الماسيه التي اعطت لها لمعانا وبريقا فوق بريقها مي:يالا يا رنوش بقي اعملي مكياجك عشان تركبي معايا تقترب رنا منها وبعين الام الحنون تنظر لها وتقول لها :انتي زي القمر الله اكبر ربنا يسعدك ويهنيكي يا مي ,,انا مش عارفه ازاي مش هلاقيكي في الاوضه الصبح,انا هتجنن وتبكي من جديد تقف مي وتحتضن رنا : انا بحس انك بنتي يا رنا مش اختي ,,ربنا يخليكي ليه تمسح رنا دموعها :ربنا يخليكي انتي ليه يا حبيبه عمري وتدخل احدي الفتيات الي مي وهي تجري يا عروسه يا عروسه ..العريس جه ثم تنحني لتقرصها في ركبتها :يا رب عريسي يبقي زي القمر زي عريسك كده تضحك مي وتشعر بالخجل تنظر الي رنا :انا مكسوفه يا روني ::متخليهوش يجي رنا :هو ايه اللي متخليهوش يجي ,,انا هروح اجيبه من دراعه عشان يشوف ان امه دعياله في ليله القدر وربنا استجاب وتخرج رنا بسرعه من باب الكوافير لتجد خالد في بدله العريس وقد بدا كنجوم السينما في احتفالات المهرجانات تقترب منه رنا وبصوت يرتعش تحاول ان تخفي وراء نبراته الكثير :الف مبروك يا دكتور خالد :الله يبارك فيكي يا حبيبتي عقبالك يا رب..ده انتي زي العسل ايه الجمال ده رنا :لا جمال ايه بقي تعالي اما اوريك الجمال بصحيح وتشده من يده لتدخل به الكوافير تقف مي بظهرها وتلتفت ليضي المكان بنور وجهها وطلتها التي جعلت خالد يفغر فاه مندهشا من جمالها مرددا :الله اكبر ايه ده , فين مي يا عروسه تخجل مي من كلماته وتقترب رنا من خالد وتقول له هامسه :حطها في عينك وقلبك يا خالد ,,مي متستاهلش غير كده خالد ينتبه لكلمات رنا التي اصبخت مثل الام التي توصي الزوج علي ابنتها فتبتسم مي وتستمد ثقه في نفسها من كلمه اختها لها ويضع خالد ذراعها بين ذراعه ويلف يده علي يدها ويخرجان من الكوافير ومعها رنا التي كانت تحمل طرحه اختها من علي الارض ليجدان زفه رائعه تنتظرهم ويتم اطلاق الصواريخ والالعاب الناريه من الاصدقاء والاقارب ************************************************ .يتبع غدا تزداد الاحداث حراره ,,ماذا سيكون موقف رنا تجاه اختها ,,وكيف ستكون حياه مي وخالد إنتظروني والحلقه الثانيه غدا ان شاء الله في نفس الموعد تعليقات القراء |
الموضوع الأصلي : قصة مخالب الحب بقلمى حصريا (الجزء الثانى) // المصدر : منتديات الستات // الكاتب: shosho
| توقيع : shosho |
تم النشر بقلم :shosho:الخميس نوفمبر 27, 2014 12:32 am - -
| ||||||||||||||
رد: قصة مخالب الحب بقلمى حصريا (الجزء الثانى) الحلقه الثانيه ..من مخالب الحب ____________ الجزء الثاني ********************************************* في بيت الزوجيه ___________ يدخل خالد حاملا مي بين يديه كما كانت تتمني ويقفان داخل الشقه في لحظه صمت ثم يكسر خالد الصمت خالد :مبروك يا مي مي :الله يبارك فيك يا حبيبي خالد :انا ,,انا هخش اتوضي ونصلي ركعتين ,,خشي انتي كمان غيري واتوضي يقترب خالد من مي وبخجل يحادثها :تخشي تغيري انتي في الاوضه وانا هغير في الحمام تهز مي راسها صامته ,,فهي تحمل هم اللحظات القادمه ولا تستطيع ان تضع لنفسها خطه للتصرف مع خالد يدخل خالد الي غرفه نومه لياخذ بيجامته ويتوجه الي الطرقه التي بها الحمام,,ثم يلتفت الي مي ليجدها لم تتقدم خطوه من مكانها \ خالد : مي انا داخل اغير ,,انتي هتباتي جمب الباب ولا ايه؟ مي تشير بيدها الي الغرفه وبصوت مهزوز ضعيف :لا انا داخله ,,,, قبل ان تمر دقيقه تقدم خالد وطرق الباب عليها :مي انتي نمتي مي بصوت يخنقه الخجل :لا انا صاحيه خالد :مي معلش يا حبيبي انا عاوز بيجاما فتفتح مي الباب ويبدو عليها انها لم تستطيع ان تفك طرحتها وحدها خالد :إيه تحبي أساعدك تدير مي ظهرها له وتشر علي رأسها ..:أصل يا خالد الدبابيس البنت حاطه علبه كامله يمد خالد يده وبرقه ينزع البابيس دبوسا تلو الاخر حتي انتهي فمدت مي يدها لتلتقط الطرحه قبل ان تقع علي الارض وتستدير لخالد لتقف بشعرها امامه ينظر لها خالد.. وفي غزل :انا مراتي احلي زوجه في الدنيا ويقترب ليقبلها بينما تدير مي وجهها في خجل :انت مش قلت هنصلي ؟؟ خالد :يتنهد ويلتقط انفاسه :اه حاضر وياخذ بيجامته من عالسرير ويخرج من الغرفه متجها نحو الحمام وبعد دقائق يدق خالد الباب مره اخري علي مي مي من وراء الباب :ايوه\ خالد :انا اصلي جعان يا حبيبي معلش ومش عارف مكان اي حاجه خالص لو ممكن تعرفيني بس مكان الاكل وانا اجهز لنفسي وفجأه تفتح مي الباب لتقف امام خالد بشعرها الكيستنائي منسدلا علي كتفيها ترتدي قميصا قرمزيا من الستان جعلها اجمل من بنات الحور خالد فتخ فاه مكبرا :الله اكبر ,,,إيه الجمال ده تداري مي خجلها ..انا هحضرلك عشا ,,تحب تاكل ايه ,,ماما محضره لنا الاكل اللي انت بتحبه ووتتجه نحو المطبخ ,,يمسك يدها خالد ويضمها من ظهرها ..انا مش جعان ,,انا كنت عاوز اشوفك بس تلتفت له مي ..وتبتسم ,,وتثبت عيناها في عيناه :بحبك اوي يا خالد,,بحبك اوي ,,أوعي تزعلني منك ابداا خالد ..يقترب منها اكثر ..انا لو زعلتك في يوم عمري ما هسامح نفسي ,, ويقضيان ليلتهما الاولي في منتهي السعاده والحب ووتنقضي اول ليله يقضياها سويا في حب و ويسافران بعدها ليقضيان شهر العسل في تركيا في احدي الفنادق كان اسبوعا رائعا مليئا لالحب والغرام والذكريات الجميله نسيا فيها الاثنان كل همومهما وكل الصعاب اللاتي مروا بها خلال الفتره السابقه وفي رحله رجوعهم في الطائره تجلس مي بجانب خالد بينما يمسك خالد يدها ليقبلها :هتنوري مصر وبيتك يا مي مي :ربنا يخليك ليه يا حبيبي وميحرمنيش منك,, خالد :ربنا يقدرني واقدر اسعدك زي ما انتي تستحقي مني ثم ينظر الي الارض خجلا وعبست ملامح وجهه فجأه :انا مش عارف اسامح نفسي يا مي علي الالم اللي شفتيه الفتره اللي ..وقبل ان يكمل كلماته تضع مي يدها بسرعه علي فمه لتسكته مي :أرجوك يا خالد الموضوع ده انتهي خلاص من حياتنا ارجوك انساه زي ما انا بحاول انساه ذكري اليمه ومالهاش اثر في حياتنا نهائي ان شاء الله احس خالد ان مي تأذت من كلماته ,,يقبل يدها خلاص يا حبيبي انا اسف تبتسم مي وتضع يدها علي لحيته الخفيفه وتهمس له :بموت فيك وبعد دقائق تقترب منه المضيفه التابعه لطاقم الطائره وتحدثه باللغه الانجليزيه تساله ان كان يريد اي مشروبات وتبتسم له وبعد ان تمشي مي :ايه ده ان شاء اله مخدتش منها رقم الموبيل بالمره للواتس ليه؟؟ خالد متعجبا:واتس !!! انتي اجننتي يا مي انا كنت قلتلها وانتي نايمه كمان ساعه لانها مرت بعصير مي :بغضب:طيب خالد يبتسم بدهاء:انا لو عرفت انك بتغيري هغيظك كتير علي فكره تضربه مي بيدها علي ركبته بشده خالد :آآآه ..وجعتني مي بنظرات ماكره :انا لو عرفت انك قاصد تخليني اغير أنا ممكن اجننك نجح خالد بامتياز في ان يمحو اي ذكري مؤلمه مرت بها مي ,وجعلها تعيش اجمل ليله زفاف بدون اي خوف او ذكريات تؤلمها,تمر الايام والحب والسعاده يرفرفان علي بيت خالد ومي ,, وتمر الايام والاسابيع والشهور ا وبدات الحياه تستقر ويذهب خالد لعمله وسارت الحياه في مجراها الطبيعي كل ما يشغل بال مي هو موعد دورتها الشهريه وهل ستاتي في موعدها ام يصفق لها الحظ لتصبح اما لم يكن هذا الامر يشغل بال خالد علي الاطلاق فهو يعرف ان مرور ثلاث شهور بدون حمل لم يعد تأخرا علي الانجاب ولكن اصبحت حياتهما ليس بها غير هذا الموضوع ,,عكرت مي صفو تلك الحياه الناعمه بوساوس العقم وظلت تبحث يوميا علي الانترنت علي اعراض العقم واسبابه وكيفيه علاجه واسباب تاخر الحمل وخلافه ...وكان خالد يعرف كل ذلك ولكنه لم يخبرها بمعرفته بعمليه بحثها حتي لا يشعرها بالخجل من تصرفاتها وفي احدي المرات بينما كانت تجلس مي مع رنا ,,الكلام ده كده مينفعش اسيب نفسي طبيعي,, رنا :يا بنتي انتي مبقالكيش حاجه لسه انتي لو رحتي لاي دكتور دلوقتي هيقول عليكي مجنونه رسمي ,,,الكشف بتاع تأخر الانجاب ده بيبدأ بعد سنه مي متوتره :انا يا بنتي ليه ظروف مختلفه ومحتاجه متابعه ,,تتنهد وتكمل كلماتها الفكره بس ان خالد لو قلتله مش عارفه هيقول ايه رنا وظهرت علي وجهها علامات غريبه ..:قوليله يمكن يقول رأي اهم من كلامنا ده ,,هو دكتور وعارف مي تهز راسها :اه هقوله انا هخاف من إيه ,,هو عارف ان انا لازم اتابع وفي يوم من الايام جلس خالد علي السفره مع مي ليتناولا العشاء وبدت مي وكأنها متردده في قول شيء ما ,,تريد ان تنطق به ولكنها تخاف لاحظ خالد ارتباكها :مالك يا مي في ايه مي وكأنها اخذت قرار ان تنطق وتفصح عن ما يدور في خيالها :انا عاوزه نكشف يا خالد خالد :نكشف ,,مين دول اللي نكشف!! مي :انا وانت يا خالد ,بقالنا اربع شهور ومفيش حمل اصل انا خايفه لحسن يقطع خالد حديثها :خايفه ايه يا مي انتي لو روحتي لاي دكتوره تكشفي هتقول عليكي مش طبيعيه,,اربع شهور ايه وبتاع ايه انتي عارفه ان انا وانتي معندناش موانع للحمل ثم يقوم من علي طعامه غاضبا مي تقف :طب كمل اكلك ,انت بتعمل كده ليه ,,وتبدا دموعها في السقوط,,انت بتخوفني عشان متكلمش معاك تاني ليه يا خالد خالد يلتفت لها ويمسح بطرف اصبعه دموعها :طب متعيطيش وانا اكمل اكل يبتسمان ويجلسان علي السفره من جديد مي:انا خايفه تكون العمليه متسببه في تأخير يا خالد او محتاجه علاج او شيء خالد :علاج ايه يا مي انتي عارفه ان اربع شهور مش تاخير مي:ايوه مش تاخير يا خالد بس دكتوره رانيا كانت قالتلي اني لازم ابقي اعمل متابعه حمل خالد بتعجب:لا اله الا الله ..مش لما يحصل حمل مي:لا مش لما يحصل متابعه التبويض بتبقي قبل الحمل يا دكتور خالد يتنهد:طب ندي نفسنا فرصه ست شهور مي مصدومه : ست شهور ..لا يا سيدي انا متجوزه من اربع شهور هستني شهرين بس كده يبقي بقالنا ست شهورلو محصلش حمل نروح يا خالد بليز خالد :انتي مستعجله ليه يا مي ,,ما براحتنا مي:انت مش عاوز اولاد؟ خالد :بصراحه لئه.. مي تقف مفزوعه :لئه؟؟ خالد يقف ويمسك يدها ويبتسم :انا عاوز بنات ويضحكان سويا خالد بنظرات غزل:ما انتي لو تهتمي بيه كده ,,شويه ضمير يا بشر كل الامور هتتزبط وتبقي تمام وبعد شهر دخل خالد علي غير عادته من البيت وكان وجهه عابثا حزينا مي :مالك يا خالد ,,في إيه خالد :ماما تعبانه يا مي,,وديتها في المستشفي من ساعتين واتحجزت هناك في الرعايه مي :يا نهار ابيض,,مقلتليش ليه ,,ازاي متقوليش يا خالد خالد :اقولك ايه بس انا اتخضيت لقيت امل بتكلمني وبتقولي ماما تعبانه واتصلت بالاسعاف أمل هي )إبنه خاله خالد وبعد زواج خالد كانت كثيره التردد علي خالتها وكثيرا ما كانت تقضي الليله معها ..وفي الفتره الاخيره كانت مقيمه مع خالتها لتدهور حالتها الصحيه مي:هي امل كانت ممشيتش من عندها من ساعه اخر مره خالد :لا والله ممشيتش انا مش عارف اعمل معاها ايه ,,سايبه الدنيا وقاعده معاها,, مي :تعمل معاها ايه يعني وبدأ الغضب يظهر علي ملامحها والغيره ,,يعني ايه سابت اللي وراها ,,دي شغاله في حضانه جمب البيت ,ويعني موريهاش حاجه ,,ثم ازاي تتصل بالاسعاف قبل ما تكلمك او تكلمني ,,المفروض اول ما تلاقي طنط تعبانه كانت كلمتنا احنا مش تتصرف وتخطط وبعدين تبلغنا ,, خالد ينظر لمي متعجبا من رد فعلها :مي بعد اذنك انا داخل اغير هدومي ونازل تاني ويتركها واقفه ويدخل الي غرفه النوم تدب مي الارض برجلها , ,وتدخل ورائه مي :اجي معاك يا خالد؟ خالد :خليكي بكره انتي يا مي ,,اصلا ده مش ميعاد زياره انا نازل بس هاخدلها غيارات من البيت واطمن عليها وبس مي متهكمه:وهي اموله مخدتش لها غيارات ازاي خالد مستنكرا اسلوبها:مي انا مش فاضي للي انتي بتعمليه ده خالص,,بليز راعي اسلوبك معايا شويه مي أحست بالخجل من نفسها فليس هذا وقتا لما تقوله او تفعله مي :طب وانت هتروح تاخدلها غيارات من البيت خالد يتنهد:ايوه مي :طب يبقي هاجي معاك مش معقول هتروح هناك مع امل لوحدكوا خالد :مي ,,امل مش في البيت عند ماما .ممكن تسبيني انزل بقي تقلب مي شفتيها فلم يرضيها رد خالد عليها . ,,وفي المساء ..مي تتحدث في التليفون مي :رنا بطلي بقي تدافعي عنه ..بقولك كلمته مرتين مردش عليه , ,رنا :مي بطلي عبط مينفعش تكوني عاوزه تكلميه في الامور دي دلوقتي خالص ,,سبيه يومين لما الست حالتها تستقر مي :تستقر ايه وزفت ايه ,,يعني لو ماتت اتصرف ازاي استني بعد الاربعين رنا :يا ساتر يا رب ,,مالك يا مي مينفعش كده ,,إهدي يا حبيبتي واقفي جمب جوزك لغايه ما الازمه دي تعدي وتسمع مي صوت المفاتيح تفتح الباب ,,لقد أتي خالد مي بصوت هامس:اقفلي يا رنا طيب اهو جه ويدخل خالد علي مي فتجري مي عليه لتحتضنه :حبيبي عامل ايه قلقتني يا خالد وازي ماما يا رب تكون بقت كويسه خالد :تعبانه يا مي ,,انا خايف عليها اوي ثم يجلس وكأن قواه اوشكت علي ان تخور ,,تحتضنه مي وتضع رأسه علي صدرها لتضمه ..:ان شاء الله هتبقي كويسه..ربنا يخليهالك ويخليهالي يا رب مرت الايام,,وخرجت ام خالد من المستشفي وكانت برفقتها امل..التي صممت علي ان تنقل معيشتها وإقامتها الي جوار خالتها لتظل معها دائما ولكن ذلك كان يزيد من غيره مي ,,وكانت تصمم ان تكون مع خالد في اغلب الزيارات التي كان يذهب فيها خالد الي امه حتي لو استدعي ذلك خروجها كل يوم الامر الذي ارهقها واشعرها بالملل والضجر وفي يوم من الايام دخلت مي علي خالد في بلكونه غرفه النوم مي بعذوبه صوت :خالد انا كنت عاوزه نمره مريم خالد ينتبه لها :مريم مين؟ مي :دكتوره مريم زميلتك اللي كانت في المستشفي ايام العمليه بتاعتي خالد متعجبا :ليه يا مي؟؟ مي بغضب :عيزاها يا خالد عشان انا بقالي ست شهور ومحصلش حمل ومش هيحصل الا لما اروح واتابع وهي كانت قالتلي الكلام ده خالد مستفهما منها :طب اهدي بس مش خناقه هي يا مي ,,اولا الدكتور اللي عمل العمليه مؤكد علينا اودامك ان الحمل يحصل بشكل طبيعي جداا ومش محتاج للقلق وحتي لو هيحتاج للقلق مش هيكون بعد ست شهور يا مي ,, مي يعني لازم استني سنتين متشحتفه ومحرومه وبعدين ابتدي ادور وافتش عن الاسباب عشان اخش في علاج ياخدله سنتين تلاته تانيين خالد :بس بس بس هديكي الرقم واعملي اللي انتي عوزاه ,,انا مش مستحمل اكتئاب وارف عاوزه تسمعهولي مي مصدومه:انا يا خالد اكتئاب وارف ,؟؟,انا؟ وتجري من امامه لتدخل الحمام وتغلق عليها الباب وتبكي بحزن لما سمعته من زوجها ,,إنها المره الا ولي التي ينعتها فيها بتلك الصفه يدخل وراها الحمام خالد ليجدها تجلس علي طرف البانيو باكيه يمسكها من ذراعها ..قومي طيب وتشد مي ذراعها منه :سيبني يا خالد لو سمحت خالد :طب قومي عيطي بره لحسن اللي بيعيط في الحمام شعره بيقع فتبتسم مي رغم الدموع التي تملئ وجهها ..وتقف امامه :حقك عليه يا خالد انا نفسي ابقي ام واشيل في بطني بيبي منك ,,خايفه اكون مش هعرف ,,خايفه اكون محتاجه متابعه وانا اللي اعطل نفسي بنفسي \خالد يضع يده علي خدها :حبيبي انت يا غالي ,,أنا مقدرش اشوفك زعلان ,,قلبي عاوز اقفشه من رقبته واعضه عشان مبعرفش اتحكم فيه معاكي مي بدلال:طب هتديني رقم مريم خالد :لا مي بحزن :لييه بقي خالد: عشان ,,هروح معاكي هناك ,,هكلمها واخد منها ميعاد فتحتضنه مريم خالد هامسا في اذنها..طب تعالي بره لحسن اللي بيحضن حد وفي الحمام مقولكيش بيحصله ايه وتضحك مي ضحكه عاليه يتبع انتظروا الحلقه الثالثه يوم السبت ان شاء الله تعليقات القراء |
الموضوع الأصلي : قصة مخالب الحب بقلمى حصريا (الجزء الثانى) // المصدر : منتديات الستات // الكاتب: shosho
| توقيع : shosho |
تم النشر بقلم :shosho:السبت نوفمبر 29, 2014 12:20 am - -
| ||||||||||||||
رد: قصة مخالب الحب بقلمى حصريا (الجزء الثانى) ********************************************* تمر الايام وذهبت مي وخالد الي الطبيبه لاجراء الفحوصات الكامله وكانت نتيجتها ان مي تحتاج الي حقن لتنشيط التبويض وتداوم عليها من ثلاثه الي اثناعشر شهرا كحد اقصي مع علاج للتكيسات مع برنامج لمواعيد العلاقه الزوجيه والمتابعه الشهريه لرؤيه مدي استجابتها للعلاج ,,كان الموضوع في اول الامر صدمه شديده عليها وضاق صدرها واحست بالحزن ولكن مع مرور الوقت استسلمت للامر الواقع واعتادت علي الحقن والادويه واصبحوا من روتين يومها ,,وكانت شديده الحرص علي مواعيد العلاج وكذلك مواعيد العلاقه الامر الذي كان يستاء له خالد وفي احدي الايام بينما كانا خالد ومي يجلسان يشاهدان التليفزيون ويتكأ خالد براسه علي مي ,,يرن جرس التليفون ينهض خالد مسرعا بعد ان نظر الي ساعته فالوقت متأخرا خالد :خير يا رب ينظر الي التليفون ..إنها امه خالد :ايوه يا ماما ..خير قلقت يا حبيبتي ,,اه ,,مين فيهم ,,يا خبر ابيض لاحول ولا قوه الا بالله ,,طب ومين قالكوا ,,, كل ذلك ومي تحاول ان تفهم شيء ولكن كلمات خالد كانت لا تصرح بشيء خالد:لا لالالا,,تنزل فين دلوقتي ,,لا محطه مصر ايه ,,انا الصبح اروح معاها ماشي يا ماما ,,سلام يا حبيبتي تقف مي امامه ,,خير يا خالد مين اللي مات خالد متأثرا :ده جوز خالتي,ابو أمل ,,الله يرحمه بقي مي:طب وهي عاوزه تنزل ليه ,,مش انت كنت قايلي انه مخاصمها عشان متجوزتش ابن عمها ومبيكلمهاش وغضبان عليها خالد متعجبا:يعني عاوزه البنت لما تعرف ان ابوها مات متنزلش تاخد عزاه عشان كان مخاصمها ,,؟؟ الله يكون في عونها تلاقيها مقهوره عشان مات مخاصمها مي مستنكره :البنت؟؟؟حسستني ان عندها اتناشر سنه خالد يتنهد من ضيقه :لا اله الا الله ,,انا مش فايق لك يا مي ,,معرفش انتي مش طيقاها ليه مي :عشان هي احلي مني ,,هو ايه ده اللي مش طيقاها ليه ,,انا مالي اصلا بيها ,,شيء غريب وتتركه وتمشي بينما ينظر لها خالد وبصوت عالي :في حياتك الباقيه يا مي تلتفت له مي مبتسمه :لودي خالد مبتسما لها :لودي ,,نعم يا مي مي:انت هتروح مع مين الصبح وكنت بتقول محطه مصر وهتوصلها انت خالد عرف ما ترمي اليه مي خالد :هروح مع امل البلد..لازم ابقي معاها..ازاي اسيبها تسافر سوهاج لوحدها مي:اومال انت هتسوق لسوهاج ازاي خالد :مش هسوق ::هناخد التوربيني مي ساخره :طيب يا حبيبي طمنتني ,,اقوم انا بقي بدري اعملكم ساندوتشات تفطروا بيها ... يبتسم خالد :لا يا حبيبي متتعبيش نفسك انا هبقي اعزمها تضم مي شفتيها بغضب وتنظر حولها فتمسك بوساده صغيره وتلقي بها علي خالد فيقوم من مكانه ليمسك بها وفي صباح اليوم التالي مي في بيت والدتها واثناء تناولهم الفطار والده مي :انا اللي اعرفه ان علي الشربيني ده راجل غني اويمليونير تقريبا رنا :علي كده بقي البت امل دي هتورث مبلغ كبير مي :اصلا ابوها ميت غضبان عليها ومديهاش حاجه من دهب امها ولا اي فلوس رنا :إيه ده يعني ممكن يكون حارمها من الميراث ولا ايه؟ مي :الله اعلم ,,,اما خالد يرجع هنعرف كل حاجه تمر الايام وما كانوا يتوقعونه قد كان ,,فقد اصبح الميراث كله لأمل واصبحت ترث مبلغا كبيرا أخذت نصيبها من الميراث ورجعت الي خالتها كان منذ سنوات حلم امل هو الارتباط بخالد ولكن كان خالد قلبه متيما بمي ,,فلم تعترف له امل ولم يعرف خالد يوما شيئا عن تلك المشاعر وفي يوم من الايام بينما كان خالد في الصيدليه التي يعمل بها يفاجيء ب أمل تقف امامه خالد :أهلا يا امل ازيك ,,خير ماما تعبانه ولا ايه امل :لالالايا خالد ماما بخير الحمد لله متقلقش انا بس كنت عاوزاك في موضوع لو ممكن مش هاخد من وقتك غير نص ساعه خالد :ينظر الي ساعته ..طب انا اودامي ساعه الا ربع تقريبا ,,وممكن اجي عند ماما بعد ما اخلص ,, امل تهز راسها وتبتسم :اوكيه هستناك ان شاء الله ,,وبينما هي تخرج من الصيدليه تشاهدها رنا التي كانت تنوي الدخول لخالد لتطلب بعض الادويه لوالدتها ..ولكن قررت الا تدخل ..يبدو وان برأسها شيئا وبعد ان تمر الساعه يدق خالد الباب علي والدته ويدخل ليقبل يدها ,,وبعدها تاتي أمل :متشكره اوي يا خالد لاهتمامك خالد :متشكره ايه يا بنتي ام خالد :شوف يا ابني اقعدوا في الصالون بره وخدوا راحتكوا وان شاء الله اللي فيه الخير ربنا يقدمه خالد أحس بشيء غريب ,,يبدو وان والدته تعرف شيئا عما يدور ببال امل في الصالون خالد :خير بقي يا ستي أمل :دلوقتي يا خالد انت عارف انا ورثي من بابا الله يرحمه تقريبا حوالي مليون وربع..ومبلغ زي ده انا مش قادره اتحمل مسئوليته لوحدي وفي نفس الوقت مقدرش يفضل في البنك كده ومش عارفه استفيد منه في اي شيء خالد يهز راسه :ها أمل :انا فكرت كتير واتكلمت مع خالتي ولقيت ان في مشروع مناسب اوي وكويس بس محتاجه شريك خالد :شريك؟؟ أمل :ايوه ,,شريك بالمجهود وانا هبقي باللدعم المادي اللي يحتاجه المشروع,,وبصراحه انت انسب واحد ممكن يعمل معايا المشروع ده خالد :انا ؟؟بس انا مفهمش في الحضانات والاطفال ولا حتي المدارس أمل :ومين جاب سيره حضانه ولا مدرسه خالد :اومال ايه أمل :انا عاوزه نفتح صيدليه تلمع عينا خالد لتلك الكلمات وتطلق بريقا تراه امل ,,فتزيد من إغرائها لها لتطرق علي الحديد وهو ساخن تختار المكان المناسب وتشوف التجهيزات اللازمه كلها ,,وتبقي صيدليه دكتور خالد ,,لان طبعا الصيدليه بالذات لازم عالورق يكون صاحبها دكتور ,,ونبقي نوثق ورق تاني عند المحامي ان انا ليه نص الايراد ,, خالد :نص الايراد ايه بس ,,والصيدليه تبقي باسمي ازاي ,,دي فلوسك وحقك يا بنتي أمل بعذوبه صوت تحاول ان تستميل خالد:انت ابن خالتي يا خالد ومش هأمن حد اكتر منك علي فلوسي وحالي وبعدين انت الوحيد اللي اكيد مش هتنهش فيه ,,موضوع الصيدليه باسمك عشان اجراءات الاوراق والتسجيل والتراخيص ,,انت الوحيد اللي اثق انه مش هيسرقني خالد :طب وليه متفكريش في مدرسه خاصه مثلا او حضانه متخصصه ؟ ,,أمل :لان ده هيحتاج شركاء تانيين يا خالد وانا مش عاوزه ادخل حد غريب معايا ..انا ماليش حد ومعنديش خبره ولا خلفيه واكيد هيتضحك عليه في اي مشروع تاني خالد :وامي رأيها إيه أمل تبتسم وبثقه تقول له :أسالها وانت تعرف ,,رحبت جدااا طبعا ,,هي نفسها تطمن عليه لانها قلقانه من ساعه الورث ده وبتقولي العين عليكي والكل طمعان ,,وكده هتبقي مطمنه طبعا ,,ده غير انها تتمني تشوف اسمك علي صيدليه ,,صيدليه دكتور خالد ثم ترق له بصوتها لتستميله :وانت يا خالد بصراحه تستحق ,,وانا عارفه ان هيكون عليك العاتق والمسئوليه الكبري بس انت ادها وادود وانا ثقتي فيك كبيره وان شاء الله انت هتكون اد الثقه خالد يتنهد:طب سبيني يا امل يومين كده افكر وارد عليكي تستشعر أمل ان خالد يريد ان يخفي عليها فرحته بالفكره ..فتحاول هي الاخري ان تظهر له ان الامر ليس بحياه او موت أمل :طب يا خالد :متتأخرش عليه بس في الموضوع عشان لو هترفض الحق افكر في موضوع الحضانه المتخصصه دي ..أنا اصلي عاوزه قبل اول السنه الجديده اكون حطيت الفلوس في المشروع خلاص يقوم خالد من جلسه ويخرج ليسلم علي والدته التي تشد علي يده اثناء السلام وعيناها تقول اشياء يفهمها خالد وفي صباح اليوم التالي . .تمر رنا علي مي في البيت بعد ان نزل خالد الي عمله رنا :وانتي وخالد عاملين ايه دلوقتي الامور بقت لطيفه شويه ولا لسه ملعبكه مي:لا والله اتزبطت شويه وهو بيروح لامه يوميا تقريبا بس بيكلمني وهو هناك وانا بروحلها يوم بعد يوم رنا :البركه في اموله يا اختي ,,اكيد مش مخلياها ناقصها شيء مي:انتي عرفتي انها جابت شغاله قاعده معاهم,,الست ورثت بقي متجيبش شغاله ليه ,,ولا هتفضل هي تخدم خالتها لله الوطن كده رنا :شغاله ,,يا جماله ,,وبتبعت الشغاله بقي للصيدليه تجيب الدوا ولا بيطلبوه دليفري مي :تبعت ايه يا بنتي الادويه بتروح من تلقاء نفسها ,,إرسال ذاتي ..ويضحكان مي تستكمل :خالد متابع يا بنتي كل شيء وعارف ايه اللي ناقص وايه اللي عاوزينه وكده رنا :احسن عشان امل دي متروحلوش الصيدليه مي :لا لا تروحله فين يتغير لون وجه رنا ,وفقد عرفت ان مي لم تعلم شيئا عن زياره امل في الصيدليه لخالد ليله امس وبعد يومان بينما كانت مي تضع كريم البشره وهي جالسه علي كرسي التسريحه كان خالد يقف امامها يبتسم لها في المرأه..ثم يضع يديه علي كتفيها: والله انتي مش محتاجه اي حاجه من اللي بتعمليها دي مي تقف وتستدير له وتضع يديها حول رقبته :ربنا يخليك ليه يا حبيبي ,, ثم تقول له بصوت مسكين :بتدعيلي يا خالد؟ خالد يتعجب من سؤالها:بدعيلك في كل صلاه والله مي :لا انا اقصد تدعيلنا ان ربنا يكرمنا بالحمل ينتبه خالد لكلمات مي ويتنهد:يا الله عليكي يا مي دايما محسساني ان بقالنا عشر سنين ومخلفناش مي مفزوعه :اعوز بالله بعد الشر بعد الشر متقولها ش في وشي كده يضحك خالد :أرجوكي يا مي انسي الموضوع ده من دماغك شويه وخلينا نعيش حياه عاديه بعيد بقي عن مواعيد التبويض والاباضه والتخصيب والتحضين ,,انا بقيت حاسس اننا شويه خرفان ونعاج مستنين التعشير مي تشعر بالاشمئزاز وينقضب حاجبيها من كلمات خالد ثم تفك يديها التي كانت حول رقبته وتتجه نحو السرير صامته احس خالد انه جرحها بكلماته يتجه نحو السرير ويجلس بجانبها .ثم يقترب منها ليقبلها في رقبتها ,,فتبعد عنه مي ,, مي :خالد بعد اذنك انا عاوزه انام ,,تصبح علي خير ,, وتعطيه ظهرها وتستلقي علي السرير ,وبينما احس خالد بالضيق والحرج ,,أغلق ضوء الاباجوره التي كانت جانبه ,,ثم امسك تليفونه المحمول ولكن ظل صوت امل في أذنيه وهي تقول له صيدليه دكتور خالد .. ظلت تلك الجمله تغازل عقله ليل نهار ,,كيف سيكون هو صاحب الصيدليه ويعمل تحت يديه فريق من الصيادله انه الحلم الذي كان يحلم بيه دائما وكذلك كان بعيد المنال دائما ولكن تري هل تتقبل مي تلك الاوضاع وترضاه حتي الان لم يفاتح خالد مي في الموضوع ولم يعرض عليها اقتراح امل.. غدا والحلقه الرابعه ان شاء الله في نفس الموعد تعليقات القراء |
الموضوع الأصلي : قصة مخالب الحب بقلمى حصريا (الجزء الثانى) // المصدر : منتديات الستات // الكاتب: shosho
| توقيع : shosho |
